超儀夜蒲遭老外推開興爆
何超儀前晚出席時裝品牌活動時心情大靚，化身影「後」大騷白滑背肌，不過她就自稱魅力不再，更自爆早前於夜店被外籍男士當透明，一手將她推開，又嘲自己幾十歲邊有人理！
前晚何超儀聯同一班好姊妹包括鄭希怡、杜如風與本地時裝設計師何志恩等出席本地著名品牌izzue活動，身穿橫間露背連身長裙的她，化身影「後」任影，記者笑她果然是名副其實的西班牙影「後」，她則自嘲：「係西班牙烏蠅！」
好姊妹支持出碟
超儀透露６月23日將舉行唱片發布會，到時一班好姊妹均會現身支持，她說：「我哋班姊妹好friend，我哋班八婆除咗食飯，仲經常煲電話粥，挑剔大家着衫，坐埋一齊就會知興乜！（講是非？）唔會，只講女人，我哋對外表好執着，只係講衫、講食兼講減肥！」
記者笑問她有否互相(目及)實彼此伴侶有否行差踏錯？她笑說：「冇刻意！係本性！」至於會否一齊夜蒲溝仔？她則彈自己邊有人理，更大爆瘀事說：「幾十歲點溝仔！我早輪喺上海去朋友間club玩，當時我着住羽絨，加上我又唔高，點知有個model跳上張枱跳舞，有個外國人即刻推開我。（你檢討下？）我除都冇用，裏面仲着件冷衫，我呢個年紀冇用，不過最慶係個model喺我杯飲品上跳舞呀！」
鄭希怡有樓收租
另邊廂的鄭希怡表示早前在大陸拍劇而少露面，問到有傳她在大陸頻接劇變小富婆？她則反問記者：「點謂之富婆？」她又透露在上海有物業收租：「我覺得上海物業升值潛力大，買嚟畀爹哋媽咪收吓租先！（你擁有幾多物業？）唔講！總之我要再努力啲啦！」
文：名人組