關心妍冇得入紅館與星煥解約
關心妍（Jade）去年加盟星煥國際榮升做「一姐」，同門師弟妹有陳法拉、鄭欣宜、許廷鏗等，不過盛傳Jade瞞住公司私下接job，對公司未能為她爭取紅館開騷感不滿，跟一手力捧她的老闆何哲圖「鬧翻」，提出解約要求。
兩入紙唔批
星煥國際老闆何哲圖承認Jade已回復自由身，他說：「死約滿咗，生約大家傾咗唔再繼續。」他曾為Jade入紙紅館兩次申請個唱，但都未有批出，Jade對公司諸多不滿，更提出解約要求，被指「反骨」，何生只謂：「公司幫Jade在頒獎禮上爭取到好多獎項，能做出好成績得到大家認同，咁佢有自己計劃，想生育又想搵人搞演唱會，我真係冇所謂，我嘅宗旨係最緊要佢開心，希望佢順順利利。」
否認曾秘撈
Jade否認一切傳聞，她說：「我冇私自接job，話我唔飲水思源，當日喺舊公司得我一個歌手跟佢走。」她強調跟公司是在愉快氣氛下結束合作，她說：「反而係我體諒佢，因為今年我主力唔係出碟爭獎，公司仲要照顧法拉、許廷鏗、欣宜佢哋，佢一個人好難處理所有人，我同何哲圖關係好好，我係搵人幫我搞紅館演唱會，雖然我係回復自由身，但佢或者到時會從旁協助我，我有新歌佢都可能會幫手。」
文：音樂組