陳嘉容瞄準男人心
名模陳嘉容轉型做主持及教授儀態打扮，不滿自己鼻音重，自言欠溝通能力的她從未想過靠把口搵食，所以獲學生封為「美麗達人」時更為喜出望外，她更希望可開發男學生的市場。
陳嘉容（Eunis）以名模姿態行天橋多年，在模特兒輩出的今日，依然屹立不倒，還成功涉足主持界，頻頻接騷晒口才。憑端莊外貌及豐富的扮靚知識，她更「升呢」成為老師，在內地企業擔任打扮及禮儀導師，現時靠口才搵食的她否認是刻意轉型：「由細到大，從來都冇諗過做老師，講嘢唔叻，做模特兒都係唔需要講嘢先入行。係喺香港接觸多咗主持先突然做老師，其實一向唔滿意鼻音，不過請我教書嘅又話冇問題，啲客畀一百分。」
難發展師生戀
Eunis表示到內地教書挑戰甚大，大嘆普通話發音困難，她講書前例必背熟所有稿子，甚有壓力，不過其努力終獲得回報，令她喜出望外：「學生叫我做『美麗達人』，真係好開心。」
問到Eunis是否介意與男學生發展師生戀？她表示全不介意，不過卻有一定難度。她說：「我都想師生戀，不過我教嘅全部都係女學生，男仔學禮儀打扮嘅市場好細，其實佢哋好需要學禮儀，希望可以開發到呢個市場。」