宋芝齡黑面發火鬧到返屋企
港姐出身的宋芝齡於圈中發展平平，緋聞亦不多，但日前她與穿拖鞋的男友在銅鑼灣街頭嗌大交！見宋芝齡黑晒口面邊行邊鬧，冷靜一輪後，到達寓所樓下又再鬧過，她更嬲到撇下男友獨自返歸。
宋芝齡雖是港姐出身，但緋聞不多，近年她已減少幕前演出。精通韓語的她開辦了韓語學校專心教書。不過日前晚上十一時許，本報發現宋芝齡與一名街坊裝打扮、踢着拖鞋的男伴於銅鑼灣鬧市街頭吵大鑊。
撇男友獨自上樓
現場所見，宋芝齡原本與男伴並肩而行，但行至一商場外，她突然停步，一臉忟憎與男伴理論，兩人於街頭嗌大交，宋芝齡還面黑黑怒睥對方，男伴雖即時攤開雙手連番解釋，但她似乎聽不入耳，未幾更轉身走人。男伴見狀即時緊隨其後，但宋芝齡仍未罷休，邊行邊擰轉頭繼續鬧。之後二人冷靜「休戰」，步行至渣甸街一大廈期間，全程相隔數個身位。直至到達大廈門外，二人又再「翻吵」，見宋芝齡情緒比之前激動，最後更嬲爆爆撇下男方獨自急步上樓，男方顯得一臉無奈，頭耷耷於附近街頭抽煙後才離開。
「拍咗幾個月拖」
記者事後聯絡宋芝齡，她承認當街與男友罵戰：「個男仔係我男朋友嚟！佢係馬來西亞人，又鬼仔性格，因為大家文化背景唔同，咪有拗撬囉，不過都係小事嚟啫，冇傷感情嘅。（係咪結婚對象？）未知，其實我哋都係年頭識，拍咗幾個月拖啫。」她又笑言：「其實我都卅歲，呢個年齡嘅女人都想嫁嘅，但都要畀時間大家慢慢再了解。」
文、攝：追蹤組