靚靚孝順典範︰日日母親節

歌仔都有得唱，「世上只有媽媽好」，母愛的偉大絕對無人質疑，所以天下間的孝順仔女每逢母親節都會想出不同的招數「冧爆」媽咪，令她們過得開心難忘。而娛樂圈的孝順仔女當中，已為人母的袁詠儀（靚靚）就提倡天天都是母親節，每天令媽咪開心，才是最sweet的大道理！

袁詠儀知道媽咪喜歡花，所以不時都會送花氹媽咪開心，她說：「唔會淨係母親節先氹媽咪開心，我覺得日日都係母親節。囝囝魔童就太細個，佢仲未識同我慶祝，不過佢日日都會錫我，好sweet。」

黃宗澤令媽咪最感動的一次，是他在中五那年的母親節親自為媽咪下廚，他說：「嗰次我真係煮咗九大簋，有魚翅添架，仲要一早搵人呃咗媽咪出街先，我搞咗成日先煮好，淨係發魚翅都要大半日。媽咪見到感動到眼濕濕。」

今年母親節，熊黛林（Lynn）的母親會在香港跟她一起慶祝，令Lynn十分開心，她說：「我係個不孝女，每年母親節我都唔喺南京陪媽咪，今年媽咪嚟咗香港，母親節我會帶佢同我一齊參加一個慈善活動，陪佢行街、食飯同埋送禮物畀佢，佢鍾意咩我都會買畀佢，但係媽咪會同我慳錢，會錫住我。」

Amanda S.做過很多令媽咪感動的事，她說︰「我真係好愛我媽咪，會畫畫同做勞作送畀佢，佢話我做嘅所有嘢都令佢好感動，佢最深刻一次係我八歲嗰年，有次佢病咗，我煲湯畀佢飲。我媽咪係事業型女性，連衫都唔識縫，但佢試過親手織咗條頸巾畀我，令我好感動。」

熊黛林	（左）Amanda S.

林莉說最難忘嘅母親節係有一年我代爸爸送花畀媽咪，她說︰「因為我阿爸為人一向唔做呢啲嘢，所以我媽咪收到花都好開心！另一次就係我第一次出糧搵到錢，即刻打一條金鏈畀媽咪做生日禮物。」

Alice B.大談冧母之道：「我試過寄咗一紮好大紮嘅花畀媽咪，裏面仲pack咗一盒朱古力，媽咪收到嘅時候好開心。最難忘係有一年我自己四點幾起身，走去廚房整早餐畀媽咪食，但點知整唔熟，好難食，但媽咪依然覺得好甜！」

汪圓圓謂每年母親節都會一家人食飯，她說：「有一年喺美國一家人慶祝母親節，我哋一家人亦剛好四代同堂，所以自己整咗一本相簿，放好四代人嘅相，大家都好開心，因為有錢都買唔到！」