黃秋生追呂慧儀當中獎

呂慧儀：呂 黃秋生：黃

第一印象 眼前一亮

呂：拍《Laughing Gor之变節》時，我做秋生哥女朋友，但唔係第一次見面，第一次應該喺演藝人協會宴會上。

黃：呢個女仔令我眼前一亮，當時四個港姐坐埋一齊，佢最突出，覺得驚為天人，仲有種高貴氣質。

呂：嘩，你唔好咁誇張啦，我係季軍咋！

黃：港姐冠軍未必一定係最靚嗰個，要配合好多條件，可能係最乖、學歷最高，仲要睇臨場表現。

呂：好多人覺得你惡，我未驚過囉，可能因為我大膽。

黃：你有咩驚吖？我驚你就差唔多，我最唔鍾意啲新人蠢得嚟又要扮醒目，Konnie就唔同，佢叻就扮蠢，為人醒目、挑通眼眉。

要講緣分

呂：我夠乖又聽話，前輩緣一向好好。我覺得問長輩問題要深思熟慮，唔好問埋啲無聊嘢，好易令人忟憎。

黃：我唔係你長輩，我哋平輩咋，曾志偉就係你晚輩嘞！我份人輩分好分明，周杰倫、梁洛施有緣分咪做到我契仔、契女囉，有啲人話想同我上契，都唔對時機契咩啫？

呂：唔契，咁拜師算嘞，但你又話「瓜」（死）咗先拜得，哈！我有時都會打畀秋生哥請教演戲心得，好似做《女王辦工室》就請教佢點可以演好港女角色？佢教我要做一啲小動作，例如伸脷，令觀眾留下深刻印象。係呢，你最近忙乜？

黃：最近忙緊點搞好啲失眠，可能因為掛住你，搞到失眠，我最鍾意你斯斯文文，感覺好神秘。

互冧互氹 開心偷笑

呂：我哋傳過緋聞喎，你仲口花花？

黃：啲幾十歲阿伯係咁架啦，你氹吓我，我氹吓你，我男女都氹架，你夠話我靚仔啦，氹得我幾咁開心！

呂：我係話你型，都係型男嗰種，靚仔太表面嘞。

黃：我寧願要表面嘢，橫掂畀人傳，索性係真都唔錯（偷笑），等如傳同你，好似中咗六合彩咁，中咗就發達嘞，點會唔開心！

呂：原來我喺你心目中係一堆number……其實我都唔介意傳緋聞，把口生喺人哋度，但傳太多擔心嫁唔出。

唔搞陳豪

黃：傳我冇所謂，橫掂個file幾吋厚，怕影響你啫。不過，傳曾志偉實在太離譜，相都冇張，建議你下次傳「筍盤」陳豪，起碼我同陳豪高度合理啲，大家都係平輩。

呂：唔得，我怕畀人掟香蕉皮，陳豪太多粉絲嘞。我覺得拍拖要順其自然，好難plan咩類型男人啱自己，愛情要嚟就嚟。

黃：講得啱，理想同現實總會有差別，你揀人人揀你，畀你搵到個好啱條件，但原來唔夾咪一樣要分手，可能最終都係曾志偉呢？哈。

呂慧儀：呂 黃秋生：黃

讚EQ高 應對一流

呂：早前你喺微博因為一段「愛國論」同人鬧交，點解咁火爆？

黃：微博上面好多人鍾意搞事，一陣話你樣衰、一陣叫黃伯收×啦！我都唔理，但話賣國係侮辱咗我人格，好多所謂愛國超人捉你一、兩個字就嚟搞你，之後好多人鬧佢啦，洗埋佢版添。總之呢個世界好多傻佬，自己將內地人同香港人分開，但又話你分，我最唔能夠容忍，依家就話得四、五個，如變成一種力量，星星之火可以燎原，我哋要扼殺於萌芽階段，如有再多十個八個就好麻煩，每日撩是鬥非，好多行家就咁畀人恰。

呂：我都試過，有人話睇完《東張西望》覺得我爭住嘢講，同其他女仔搶風頭。對方仲challenge我話：「全港第一，最造作女藝人。」我回覆：「是嗎，全港？咁厲害？」最終佢態度軟化，話冇嘢之餘，仲多謝我添。

軟弱被踩

黃：我都話你叻啦，淨係睇你同曾志偉傳緋聞後應對一流，你當時話要多謝傳媒畀個封面你，幾鬼高呀，EQ高！

呂：係呀，傳媒真係好錫我，生日就畀個封面我做。我認我EQ高架，同我做朋友會畀好多正能量他人。

黃：你用呢個方法好，但我呢啲「老油條」，如果咁講實在太軟弱嘞，真係會畀人踩。所以我要用少林外功法，兜口兜面一拳打落去，好明確話畀人知，我份人又毒又衰、轉數又快，你同我拗咩？我打得、寫得，總之就唔好搞我，容忍有個限度。

大開中門 以靚行先

呂：舊年我做《香港先生》主持，好多人話嗰條紅色開胸裙太出位，其實我係以靚行先，同設計師研究過，肯定唔會走光先敢着出嚟。

黃：着成咁都冇露點咪畀人鬧囉！講真呢類開胸裙好普通，舒淇都着過，今屆奧斯卡個個都咁着啦，耐不耐仲走光添，你冇走光仲唔係專業？冇失禮人。

呂：我性格比較男仔頭，平時着衫一啲都唔性感，要睇工作場合需要先咁着，而且好安全，從未試過失策走光。

眼睛最靈

黃：都唔知啲人鬧乜？做呢行唔可以搶鏡、唔可以高調、冇人識就最好呀？講完啦！我最憎啲人黑心，踩低人哋就覺得自己好高貴。我成日讚你呢條裙carry得好好，係整體感覺，唔單止講身材，好多人自己下流，又唔見我睇完之後落晒喺你身材度，當然有部分係啦……哈哈！

呂：你講過性感同暴露唔同。

黃：有啲人為露而露，但暴露唔代表性感，仲會着得好核突。一個人最靈嘅地方唔係胸部，係眼睛，因為眼係靈魂之窗，影響整個人嘅神態。

呂：咁我冇將唔開心嘅事放喺心上，我做番自己。現階段只想努力賺錢，之前買咗層樓仲供緊，但係好蝸居（細）咋。

黃：既然係蝸居，證明你係正正經經搵錢，冇去富豪飯局。

呂：我由細到大都咁正經，覺得自己賺錢馨香啲。

後記：

同影帝級人馬黃秋生做訪問，呂慧儀全程戰戰兢兢，連提供拍攝場地的法國餐廳都不敢怠慢，特別找大廚煮了碟黑松露特色意粉給秋生吃，經理更爆料說：「呂慧儀嗰碟係二廚煮嘅，味道係咪有啲唔同？」Konnie即撒嬌指不公平，相反秋生大讚廚師有料到：「我都好鍾意煮嘢食，唔知佢肯唔肯教番兩招？」

文：珊林

攝影：司徒國榮

場地：Amuse Bouche法式料理

服裝：BCBG Max Azria（呂慧儀）