周秀娜MK罰企蜂波吸客
周秀娜（Chrissie）昨現身旺角鬧市，即吸引大批途人及龍友爭相拍照，情況混亂！對於早前被師妹何佩瑜（Jeana）暗寸年紀大一事，她竟以德報怨，大讚師妹漂亮之餘，更自嘲不是天生麗質，從而彰顯她非凡的氣量。
Chrissie昨日化身蜂后，露出三吋事業線，現身旺角行人專用區出席Motorola XOOM Wi-Fi活動，引來大批途人圍觀。
靠打拍子跳舞
開場前，由於音響問題，令Chrissie被迫站在布景板後長達10分鐘，期間不斷被途人影相，場面尷尬。最後，活動於音響失靈的情況下繼續進行，Chrissie要靠舞蹈員邊打拍子，邊跳舞。她笑言：「都有少少難，不過之前練過幾次，又有dancers提，都OK。（擔心走光？）唔會，件衫訂造嘅，而且好啱主題，夏天小蜜蜂要努力啲出嚟採蜜！」
「人人都想我死」
問到有關師妹Jeana早前暗寸她，而被經理人照肺一事，Chrissie回應：「唔知，大家都OK，同公司唔想有是非，知佢今年出寫真。（眼紅你？）唔覺，我自己都唔出寫真，經理人應該偏心佢哋多啲，放一條生路畀我行啦，人人都想我死。（邊個？）講笑咋！（公司靠你賺錢貼師妹？）冇，我天生唔麗質，所以小蜜蜂要努力啲嗡嗡嗡！今年好多人出寫真，我都希望佢哋有好成績，佢哋咁靚。（你唔出寫真點賺錢？）我會出手機app，用其他途徑搵。」
另外，她透露年尾將接拍動作片，笑言雖然有泰拳根底，但仍希望學各類型功夫：「如果書展嗰陣有人埋身，就可以一拳打爆佢！」
文：名人組