洪欣割席拒祝福舊愛
因吸毒被捕的莫少聰於朝陽區看守所拘留十五天後，昨日凌晨終獲釋。不過舊愛洪欣一於少理，表明不會聯絡對方，更無暇送上祝福，只冷淡拋下一句：「希望佢冇事！」
於看守所逗留漫長十五天過後，莫少聰終獲得自由，昨日凌晨從看守所離開，並於下午四時許在微博報平安，獲好友熊欣欣及上山詩鈉等留言慰問。不過身為舊愛的洪欣，雖然同樣身處北京，但對阿聰獲釋表示不知情。
「冇時間理其他嘢」
連日來忙於分身拍攝電影及劇集的洪欣透露沒有留意相關報道，即使阿聰於微博報平安，她亦沒有過目：「話放出嚟都係你哋（記者）講。（有冇嘢想同佢講？）唔會，冇咩好講。之前一直冇聯絡。依家放出嚟，唔會突然間想搵佢，希望佢冇事，就係咁簡單。」作為教徒的她被問會否向阿聰送祝福？洪欣冷淡地謂：「我一日拍十幾個鐘，瞓都趕唔切，冇時間理其他嘢啦！真係唔會得閒去理咁多嘢，都係嗰句，希望佢冇事。」
提到她與阿聰所生的兒子莫鎬廉，近日改名為張浩鋒，洪欣指此乃囝囝主意：「佢好鍾意自己改，英文名都改十幾個，中文名又係自己諗。佢好鍾意爸爸個『鋒』字嘅音，至於點寫就係我哋幫佢諗，所以係唔同寫法，不過唔緊要，但係佢身份證就冇改。（將囝囝改名消息話畀阿聰知？）都唔會。」
吳啟華北上約阿聰
另外，視阿聰為好兄弟的熊欣欣，昨日接受長途電話訪問時透露已得悉阿聰獲釋：「我依家喺杭州，打過佢電話好多次都未聯絡到。」他表示其監製清末電影《光輝歲月》絕不會換角，因角色是迷失自我的人，是為阿聰度身訂造。同樣是阿聰老友的吳啟華亦處處表現關心，他稱稍後要北上拍劇，若時間許可便會約對方見面。
文：影視組