學友男人50一字馬
七月便五十歲的「歌神」張學友，在三個小時演唱會中施展渾身解數，穿上卅磅重的歌衫勁歌熱舞，又表演苦練多時的一字馬，更自爆站在離地40呎高的鐵架舞台上唱歌驚到腳震。
廿場的「張學友1/2世紀演唱會」前晚空降紅館，由學友獨跳踢躂舞揭開序幕，繼而有音樂劇、搖滾、爵士及金曲回顧等表演，在重演契媽沈殿霞的經典一字馬時，全場拍爛手掌，他笑說：「我落得好辛苦，畀多啲掌聲。」他更擺出蘭花「V」字手勢。
11萬粒水晶紳士服
當學友站在離地40呎高的鐵架小舞台大唱搖滾歌曲時，他自爆驚到腳震：「個台好搖，有一半我喺度震，我未試過企到咁高，其實好驚，好危險，我都諗會唔會撻落嚟？」笑爆全場，由於舞台設計跟頭排的觀眾席似零距離，他搞笑說：「大家可以睇吓喉嚨震音係點樣。」
演唱會上學友穿上以紅、白閃令的一系列紳士服，其中一套銀白閃令的歌衫由十一萬粒水晶製成，重達卅磅，他笑說：「呢套衫係我着過最閃嘅，孭住嚟唱唔係簡單嘅事，不過最緊要靚。」見他除去紳士帽時，前額顯見被重量不輕的帽子壓出大片紅印。
學友一口氣勁歌熱舞連唱《餓狼傳說》、《頭髮亂了》及《這個冬天不太冷》，唱罷後他笑說：「得唔得？真係唔係講笑，正所謂都1/2世紀年紀，將來講起張學友，都知佢唔係一個木頭嚟，唔係淨係郭富城先跳得，佢練一日，我咪練十日。」
頻放笑彈擺chok樣
風趣幽默的學友在台上經常放笑彈，戴上紳士帽時，他甩一甩頭，撥髮即笑說：「撥髮呢下都撥咗好耐。」搞笑地擺chok樣，他又大讚來捧他第一場個唱的觀眾勇敢，他笑說：「好彩我穩陣，唔係你哋就慘。」他又自詡是「歌癡」，覺得在廁所唱歌echo都幾好，最後他感謝來聽他唱歌的觀眾，令他這個晚上變得好有意義。
文：音樂組