懶與丘亞葵對質 阿姐：大把嘢要理
汪明荃的影迷會「明荃之友會」昨日發信給傳媒，指有傳媒對之前演唱會的座位編排報道與事實不符。阿姐昨日接受電話訪問時表示：「其他人做乜我控制唔到，佢哋覺得我啱，多謝佢哋支持。」提到演唱會主辦負責人丘亞葵不開心，更取消明年與她的粵劇合作，她謂：「尋日有記者打畀我，我都話冇呢件事，冇人聯絡我同我傾過，唔好亂寫。」問是會否不再與丘亞葵合作？阿姐稱：「好難講，大家要開心囉！」她續稱丘亞葵沒有聯絡她，更不會與對方當面對質：「唔啦！大把世界大事我要理。」
丘亞葵則自稱問心無愧，問會否再與阿姐合作？他答：「要講緣分，暫時睇唔到有緣分到。」另外，汪明荃於昨晚出席加入無綫四十周年的晚宴，無綫為她筵開五席，丈夫羅家英及眾多好友均有出席，鄭裕玲更送上24K金花。阿姐稱有意請鄭少秋，但對方有事而缺席，並強調沒有因座位編排而嬲鄭少秋。
