超儀半紅不黑 家人話渣

入圍當沖喜

何超儀2002年憑電影《地久天長》榮獲香港金紫荊頒獎禮「最佳女配角」；2004年再憑《豪情》中「趙啷啷」一角，榮獲香港電影金像獎「最佳女配角」。

在父親何鴻燊協助下，超儀投資成立電影公司「852」，頭炮作品《維多利亞壹號》便令她成功升呢，憑變態連環殺手一角，入圍角逐今屆金像獎女主角，超儀坦言打了一支強心針。

「當日宣布入圍名單時，爹哋剛巧在身邊，我將呢個消息同佢講，佢話我威到盡、最威係你啦。爹哋一直對我好大支持，其實我最想係將呢個獎送畀佢，呢個先係我嘅心願。」

入圍喜訊宣布同時，家中卻發生爭產事件，不過超儀卻一副懶理的姿態。

「我覺得係一件好事，當係沖喜，我份人係家庭同事業分得好開，我係一個好自私嘅人，屋企有咩事我仍然會以工作為先，唔會理人，無嘢可以阻止到我，我唔係好理屋企嘅嘢，冇嘢煩到我。」

超儀揚言倘奪影后，會將獎座獻給父親賭王。

五位準影后將於本月十七日一分高下。

冇後台支持

超儀認為娛樂圈就好似戰場，時至今日企得住腳，都算係咁。

「我最想證明畀家人睇，我入娛樂圈唔係玩玩吓，五、六年前曾經聽過有微言，屋企人同我講過叫我唔好撈，話我做咁耐都半紅不黑，佢哋覺得我好渣，我就解釋我各方面都欠缺支持，又冇同大公司簽長約受力捧，喺娛樂圈就好似打仗咁，依家都企得住腳、生存到，都算係咁。」

隨時乜都冇

開公司拍電影當然以賺錢放首位，攞獎固然開心，不過亦隨時一無所有。

「開電影公司拍電影出嚟，當然希望多啲人入場欣賞，得到外界注意，如果有獎當然更好。開公司梗係想搵錢，獎項係另一個目的，我開公司嘅理念係拍多元化、不同類型嘅電影，但拍了電影多年，現階段反而覺得獎項不是最重要，好多人問我有冇信心，我覺得今次自己係一隻黑馬，隨時大獲全勝，亦隨時一無所有。另類電影作品就係頒獎禮咁，結果會係好極端，今次唔係開大就開細。」

「妓」藝不凡

超儀從影以來，演得最多的竟然是妓女，連她也說「唔想再演」。

「喺我心目中，當年《蝴蝶》中嘅演出我覺得係我最突破嘅一部作品，無提名我都好失望，甚至冇乜人知我演出過呢部電影，有種『雙失』嘅感覺。我喺《紫雨風暴》都演得好殘忍，跟住再演《維多利亞壹號》，令我演得更精彩。

「我演藝生涯入面演過七次妓女，真係唔想再演。雖然做咗老闆，但如果出面有人搵我拍戲我會接，我都要搵錢生活，我好想演一啲問題女人嘅角色，愈有難度愈好。」

棋逢敵手似夾心餅

何超儀躋身「最佳女主角」五強提名，當中薛凱琪年資最淺，劉嘉玲則獨當一面，演出經驗最豐富，表面上似是眾人的頭號勁敵。何超儀則表示今屆各入圍者類型都有不同，她說：「一聽到對手個名都好驚，個個都好好。薛凱琪有青春又年輕；劉嘉玲係一個好靚嘅女人，演出有一種霸氣；楊千嬅嘅演出方式係平民式，加上佢人氣好旺，而學院派講演技又有湯唯，今次真係棋逢敵手，我自己就好似夾心餅咁。」

劉嘉玲有霸氣，薛凱琪夠青春，同為今屆影后大熱。

薛凱琪

文：影視組

化妝：嫻仔

髮型：Sam Pang @ hair culture