章小蕙漏夜返港護女
前日鍾鎮濤（阿B）女友范姜與鄰居、兼前妻的妹妹章小婉爭執，傳聞事件由B女鍾嘉晴疑被打而起，身為生母章小蕙漏夜從美國飛返香港護女撐妹。事件鬧大，身為Tinka生母的章小蕙不敢怠慢，原定本月中返港見囡囡，立即放下手上工作，漏夜飛返香港護女兼撐妹。昨日記者致電章小蕙美國手機，由一名外籍男子接聽，承認章小蕙出國，但拒絕透露去向。之後記者致電章小蕙香港手機號碼，原本前日此號碼關機，但昨晚突然接通，相信章小蕙已返港。
章小婉：交警方律師處理
至於報警的章小婉，昨日記者致電查問，她禮貌地回應，但提到姨甥嘉浚和嘉晴分別在facebook怪她多事，以及家姐章小蕙返港撲火，章小婉立即收口，更託詞匆匆收線。
（記：記者 章：章小婉）
記：你同范姜當時爭執乜嘢？
章：我依家乜都唔講得，我返緊工，已經交晒畀警方和律師處理。
記：你係咪好嬲？
章：等律師處理。
記：有冇聯絡家姐章小蕙？
章：我趕緊文件唔方便講。
記：你知唔知兩個姨甥嘉浚和嘉晴喺facebook留言話你多事？
章：（無奈地嘆氣）唉，我唔回應啦，細路仔嘅嘢唔好咁咩……
記：唔好咁認真？
章：咁又唔係……我唔知，我好忙。
記：章小蕙係咪為咗呢件事即刻返香港？
章：……唔知！
而嘉晴所屬中學，記者昨日致電查詢，惟校務處職員記下記者電話後，截稿前仍未回覆。
文：專案組