阿B范姜笑住開餐

阿B與前妻章小蕙離婚12年，雙方恍如陌路人少有往來，偏偏他們卻與章小蕙胞妹章小婉同住半山樓，前日下午雙方在住所大堂狹路相逢，有指章小婉因早前嘉晴（Tinka）面腫流牙血一事狂質阿B，雙方發生衝突，有人搶去章小婉的手機擲爛，結果章小婉報警，范姜以刑毀被捕。

恩怨情仇再掀風波

事件令阿B和章小蕙的恩怨情仇再掀風波，只有16歲的嘉晴更成為關鍵人物，據知被范姜一手湊大的她，兩人情同母女，事發後嘉晴因擔心范姜而失眠，凌晨1時許於facebook留言：「我爸爸和繼母一直都好錫我，但突然間佢哋竟受到沉痛嘅傷害？點解呢個世界會有啲咁唔道德同邪惡嘅人？」身在加州讀書的嘉浚，昨日亦在fb力撐范姜，血氣方剛的他㷫到狂爆粗及開名狂插：「佢係我媽咪嘅妹妹，佢同我爸爸一家人過唔去，如果佢唔離開，我會同佢連埋佢身邊人斷絕關係。」暗示連親生媽咪章小蕙都冇面畀！

范姜笑容滿臉，似把和章小婉的爭執拋諸腦後。

阿B與范姜未受事件影響，拍拖開餐。

嘉晴否認曾遭體罰

至於身為爸爸的阿B，昨早7時30分親自送嘉晴返學，本報追問阿B詳情，他說：「依家唔方便講嘢。」兩父女在司機駕車下到學校，問嘉晴是否曾被體罰？她冇答，再問是否有社工跟進？嘉晴才開腔澄清：「冇。（有體罰你？）冇咁嘅事。」

而阿B為撇記者遊花園，返家後問他心情如何？他說：「冇回應。」下午約2時，阿B和范姜離家去灣仔用膳，兩人保持微笑表現從容，再問阿B心情，他說：「依家唔方便講任何嘢。」范姜則全程緘默；飯後阿B去接嘉晴放學，返家後說：「兒童節快樂，希望各位小朋友都快樂。」然後去了紅館綵排音樂會。

忍無可忍爆發衝突

據知情人士透露，自阿B一家搬入半山樓後，才知跟章小婉同住一幢大廈，雖然雙方是過氣親戚，但一直不相往來，兩家人互有積怨。

據知，事發時章小婉指摘阿B唔理女兒咬住唔放，忍無可忍的阿B說：「唔好再騷擾我屋企人，唔好擾騷Tinka（嘉晴）。」不甘被寸的章小婉咆哮：「你係邊位？」阿B：「我係佢老竇。」章小婉激動指住阿B個鼻狂鬧，范姜即制止，混亂間章小婉電話被整爛，她將矛頭轉向范姜喪鬧，當警員到場後，章小婉向警察聲稱有人打到嘉晴面腫口腫。

文：音樂組