何超雲稱另有其人周柏豪：係佢嚟！

何超雲與陳山聰的緋聞鬧得熱烘烘，一直未有公開露面的超雲前晚終於出山，出席洋酒活動，同場還有林莉、任賢齊、諸葛梓岐等。期間超雲雖然對緋聞有問必答，不過，她死口不認與陳山聰拍拖。

提到緋聞，何超雲強調：「同陳山聰係朋友，唔係好似你哋咁講。（影到佢攬住你條腰上直升機去澳門？）嗰個絕對唔係佢，係我另一位朋友。（另一位男朋友？）係朋友，總之唔係佢，唔想講太多。（媽咪有冇問？）佢好開通，冇乜點理我，媽咪知道係朋友。（佢會唔會反對你同已婚男人拍拖？）問我媽咪先得。（佢對陳山聰有乜印象？）冇講過，媽咪對我絕對信任，好放心。（對你造成好大困擾？）都會有少少，因為出街煩咗，好多記者車。」

放大圖片	柏豪坦白承認一直有留意與何超雲有關的緋聞。

不知兩人罵戰

至於另一緋聞男友周柏豪，超雲直言最近已減少聯絡，問她知否陳山聰與周柏豪因她而掀罵戰？她否認因自己而起：「我唔知佢哋係咪鬧交，都唔知係咪為我，其實都唔關我事。（會唔會做和事老？）當然冇，唔關我事。（點解會同柏豪少聯絡？）可能呢件事太多人講。（係咪想避忌吓？）都係。」不過問到是否與陳山聰也減少聯絡，答案明顯不同：「都係朋友。（陳山聰有乜好？）朋友冇分等級。（識幾耐？）唔係好記得。（覺得佢個人點？）今晚唔想提呢個人。」談到分產事件，超雲坦承她是為此事而由英國回港，又稱現時事件已解決，大家對結果十分滿意。

任賢齊百忙中抽空出席活動。

林莉穿上tube dress，露出香肩，明艷照人。

唔介意做輸家

雖然超雲否認與她乘坐直升機之人是陳山聰，但昨日周柏豪出席遊戲機活動時，就唱反調：「我有睇雜誌，係佢（陳山聰）嚟o架嘛！（你好留意？）我有睇娛樂新聞，係我工作，我怕記者問我唔識答，又怕答錯，會好多誤會。」對於超雲表示要疏遠他，柏豪坦言二人向來少聯絡，對被稱「輸家」也沒有所謂，還大方祝福對方。

文：名人組