吳彥祖增肥操肌博生仔
於新片飾演項羽一角的吳彥祖，為配合角色魁梧的造型，一日吃五餐來積極增肥，現肥了22磅外，更笑言練大隻會易生男丁。他續說已跟名模太太Lisa S.取得共識，若真的造人成功，Lisa會放棄一切專心湊B。
昨日於中環出席「健康空氣行動」的吳彥祖，身形明顯比前魁梧，他說因為要配合由陸川執導的新片《王之盛宴》中飾演的項羽一角，除了狂吃增肥外，更言導演要求演員穿着重達三十磅、以金屬造的盔甲上陣。
吳彥祖說：「每日着十幾個鐘，唔彎得腰，每日都要按摩鬆吓。為咗練大隻啲，一日食五餐同埋健身，肥咗22磅，依家有177磅，成世仔都未試過咁肥！（太太有冇話你肥？）我成日問佢夠唔夠肥，問到佢厭，仲話：『收聲啦！唔好咁煩！』」
太太全職湊BB
早前Lisa S.直言即使世界末日都要生BB，問到吳彥祖是否想練大隻來造人，他說：「梗係啦！操fit啲生仔都易啲。因為我係獨子，所以都想生個仔，如果生女會有啲擔心，驚佢第時被人追咗去，因為我都年輕過，知道十幾歲嘅男仔諗乜，不過就算真係女都OK，好彩有咁多uncle、autie睇住。」
直言現在努力造人的吳彥祖，說十分關注空氣質素問題，「呢幾年愈來愈差，我唔知下一代點算，每年有二萬幾人因為空氣污染而病，我真係好驚。我同太太有共識，將來有BB佢會放棄一切專心湊仔，如果空氣污染惡化，會搬返美國。」
武力對付情敵
此外，吳彥祖與古天樂昨日接受查小欣電台訪問宣傳新片，吳彥祖大讚拍檔高圓圓是個很甜美的女孩，平日都忍不住要逗對方開心，古仔亦大讚她肯學。問兩人現實生活中有否「爭過女」？吳彥祖笑謂：「冇喎，都係Lisa溝我，佢自己都係咁講，我唔係鍾意競爭嘅人，如果真係有情敵，打過囉！」而古仔直言如果被「撬牆腳」亦冇辦法：「我都唔想嘅，算囉！」
文：名人組