琴姐手震驚有柏金遜

從影六十年的琴姐，敬業樂業，又順得人，導演、監製相邀演出都永不托手肘，即使年事已高，近兩年在無綫拍過百集劇亦長做長有，由於要捱更抵夜，去年更在開工期間不支暈倒，最近一班幕後人更傳出琴姐患上柏金遜症，言談間替她辛苦：「佢又唔係冇錢，都唔知佢捱得咁辛苦為乜！」

樂小姐聞言緊張

親友雖為之擔心，但琴姐亦不欲公開病情，昨日記者向琴姐了解她的柏金遜症病情時，琴姐未有正面回應，語帶輕鬆說：「我係驚有啫！邊啲人多事呀？我喺個節目上玩話自己手震，唔知自己有冇柏金遜症呢？我遲啲都返澳洲，仲會演出，唱首歌咁啦！（有人照顧嗎？）我個女陪我！」

曾經與琴姐合作的林峯和鍾嘉欣，問可知對方病情？林峯昨說：「未清楚件事唔回應。」而鍾嘉欣則謂：「唔知……合作時琴姐好健康、精靈，聽到咁都好擔心，每個人會經歷老年有病，希望佢快啲好番！」琴姐與無綫尚有一年合約，昨向高層樂易玲了解，她緊張說：「琴姐冇事嘛？唔好嚇我！等我問吓先！」

林峯、鍾嘉欣曾與琴姐合作，對她有病表示要了解。（資料圖片）

關菊英來接琴姐去看醫生。

關菊英陪睇醫生

目前全面停工的琴姐，閒來只會與友人茶敍，及不時會到診所或醫院見醫生，跟進病情。昨日中午記者在灣仔遇上琴姐和老友余慕蓮等人相約飲茶，至下午三時多，契女關菊英到場接琴姐到尖沙咀診所約見醫生，精神尚算不錯的琴姐，行動較慢，身旁包圍工人和司機，他們都小心翼翼地攙扶。據勞永樂醫生表示，柏金遜症是病人腦有一部分退化，影響肌肉僵硬而顫抖，故容易手震、行動易跌倒及面無表情，但病發初期可服藥控制或物理治療對病人都有幫助。

文：影視組

攝：追蹤組