老友博宣傳 吳國敬：正常啦
安仔高調宣布跟Sammi重燃愛火，一班老友紛紛送上祝福，吳國敬說：「恭喜晒！兜兜轉轉都係呢件，甜到漏。」阿敬大爆上星期跟Sammi、陳奕迅到何超儀屋企ＢＢＱ，雖然安仔不在場，但Sammi依然春風滿臉。有指安仔借Sammi宣傳個唱，阿敬抵死說：「正常啦！你開演唱會有呢啲舉動，全世界都會話。但作為朋友唔係咁諗，要例牌否認，把口話冇理由，但真心嗰句係：『唔係宣傳嘅宣傳真係正！』一舉幾得。」
身在北京為新碟錄音的張衞健說：「咁多年之後仲可以有愛，係主嘅恩典。不過自己有啲唔開心，以後約安仔打波要同Sammi搶人。」他不認為安仔借戀情宣傳：「呢個時間不避嫌疑講最好，見到安仔嘅勇敢、承擔。」梁漢文亦說：「唔喺記者會講喺邊度講？宣傳不如合唱先！」蘇永康則謂：「我覺得比財政預算案同施政報告更加順應民意。」同是新秀出身的杜德偉和呂方亦叫好，杜德偉更叫兩人早日結婚。
另外，身為Sammi教友的陳淑蘭表示：「佢之前話好乾旱，依家每日都如沐春風。（Sammi之前有冇露口風﹖）有啲關於查經班嘅嘢我唔方便透露。」