安仔開腔認翻撻Sammi
許志安親口宣布和分手多年的舊愛鄭秀文（Sammi）復合！一副得米的他口口聲聲要低調愛情，但難得今勻乃宣傳演唱會的大好良機，故他也不怕被指口是心非擺復合新聞上枱，更好「型」的發表偉大「侮辱愛情論」，自圓其說非偽君子。
安仔和Sammi的緋聞傳足廿年，自分手後，失天后靠山的安仔，人氣極速滑落。為打救如死水的事業，過去多年來，安仔每逢出碟、開演唱會，都「獨沽一味」借緋聞上位。最近一次，乃去年傳出為與Sammi復合，狠撇秘戀三年的圈外女友余德琳（Michelle），鬧出疑似「三角戀」的緋聞。雖然負面多過正面，可是仍帶旺財路，其兄弟組成的BIG FOUR巡迴演唱會共舉行了逾廿場之多。
嘗試重新認識
即將舉行演唱會之際的安仔，日前又「咁啱」被傳媒拍得和Sammi撐枱腳的照片，隨即再惹他重施故技博宣傳之嫌。昨早他接受查小欣電台訪問時直認與Sammi復合，之後出席公開活動，更春風滿面正式公布和Sammi成功翻撻的天大喜訊。他說：「我同Sammi食完嗰餐飯後，畀記者影咗。喺呢幾日，我同Sammi有共識，覺得呢個係事實，應該要講畀朋友知，拍拖係好普通嘅事，我哋嘗試開始一齊，重新認識。」
不會侮辱愛情
安仔重申和Sammi是「啱啱」重燃愛火，望外界給予他們時間及空間。問他如何吸引Sammi？他即說：「感覺。（邊個追邊個？）感覺呢個冇得講點開始，好natural。」他承認這段情令他承受不少壓力，所以會低調處理。再問是否比以前更甜蜜？安仔笑到出晒皺紋點頭：「唔。」
對於在此時前高調承認復合，令人覺得有宣傳之嫌？安仔說：「呢個我好放得開，相信冇人將一段真感情攞去做宣傳，否則就係侮辱愛情呢個兩字。」有指時間好配合令人難信服，他則說：「要嚟冇得去計，呢啲唔使理人哋點睇，隨自己個心。」
否認今年結婚
今年是安仔入行廿五年，問與Sammi翻撻是否最好禮物？安仔笑說：「希望係啦。」有報道指其舊愛余德琳患了抑鬱症，要家人勸她服藥，安仔避重就輕謂：「我哋要睇前面，展望將來，以前嘅事唔好提，佢係圈外人，唔好打擾佢。」另外，安仔和Sammi復合前曾傳出不少消息，包括今年結婚、趕生仔、送上999支玫瑰求婚，他全部否認，又指結婚太長遠，現時只想用平安的心去面對將來。問到是否已跟女友信主？他說：「今日唔講呢個話題。」
活動上，身為安仔及Sammi的經理人郭啟華，被問Sammi會否擔任男友個唱嘉賓？他直認有此打算：「上次開會，安仔第一時間刪咗Sammi個名，我估因為佢哋一、兩個星期前啱啱開始，所以佢緊張咗啲。」郭啟華認同此時才宣布復合難免有博宣傳之揣測，不過他力撐安仔說：「呢個宣傳係傷害，唔會有人咁蠢。」
文：音樂組