林夏薇實力上位拒借峯勢

我自小表演欲好強，好動又唔怕羞，性格好開朗，細細個就開始鍾意唱歌同跳舞，就算喺人前表演都唔怕。算唔算男仔頭？我覺得自己係動靜皆宜。

誤打誤撞入娛圈

其實我入行可以話係誤打誤撞，亦可以話係循序漸進，點講好呢？我之前先參加全國明日之星比賽得到「最佳上鏡獎」同「最佳才智獎」，後來朋友提議我考北京中央戲劇學院，誤打誤撞又畀我考到。一去就去咗五年，頭一年係準備入學試，之後四年就係進修中磨練演藝，北京中央戲劇學院好嚴，就讀期間唔畀喺出面接戲。當年我隻身到北京，屋企人冇反對，佢哋好民主，從小就畀我好大自由度，我作任何決定前都會同家人商量，佢哋好支持我，認為每一行都有發揮機會，只要我鍾意就得。

富豪飯局未聽過

我由細到大都好獨立，一個人喺北京唔驚亦冇思鄉病。畢業後，又一次緣分安排下加入香港話劇團，而且仲擔正女主角，我好開心，受寵若驚之餘亦有啲擔心，因為我之前演出係全普通話，唔知用廣東話演出得唔得，我唔係唔識講廣東話，只係喺北京講普通話太耐，而且同屋企人溝通都係用閩南話，再加上香港好多「術語」我都唔識，好彩老師同同學都在旁教導我，令我好快上手。人人話銀色事業係大染缸，又話有富豪飯局，我一啲都唔覺得，我只做好自己本分，享受演戲樂趣。

把握機會不急進

我會把握同珍惜任何機會，但想一步步嚟，唔想一步登天，先打好基礎踏踏實實行每一步，感覺實在啲！我都聽朋友講我近期喺網絡度好紅，多人認識反而覺得壓力大，其實我唔清楚自己係咪紅，只係鍾意演戲，好enjoy份工作，紅唔紅對我嚟講唔重要，只希望人哋睇到我嘅努力，覺得係實力之人，我會盡力做好自己同畀心機演好每一套戲／劇，我相信默默耕耘，唔知道咁嘅諗法係咪簡單，但凡事都係睇機緣，機會到，而自己仲未準備好都冇用，最重要係安分守己。

林峯感情好 自細當偶像

林峯係我堂哥，我哋關係好close，感情要好，但我想人哋睇到我嘅努力，而唔係成日講我係林峯堂妹。我都知道因為係佢堂妹而多人注意同認識我，但知名度高咗相反令我覺得更有壓力，唔想畀人話靠堂哥上位。講真，堂哥係我榜樣亦係我奮鬥目標，佢中學時已經係我偶像，依家更係我哋全家人嘅偶像，佢真係一個好努力嘅演員，我入行時都有問佢意見，佢都好尊重我選擇。

有報道話堂哥幫我鋪路入無綫？我冇聽過，亦冇咁嘅需要。如果將來同佢有合作機會，我唔會抗拒，但都係嗰句，先做好自己本分，將來事冇人知。不過，我都好欣賞張曼玉同陳道明，都希望將來同佢哋有機會合作，我較鍾意實力派演員。

男友要過家人關

靚女多人追不足為奇，薇薇同樣不乏裙下之臣，可惜她對感情事毫不着緊，認為工作至上。如果要奪得美人歸，耐性備受考驗，等得就等吧！

有冇人追？有啩！我真係冇時間，追求者失望都冇用，我亦都唔想佢哋等，現階段事業為重，感情事都係睇緣分，我諗緣分未到！其實，我擇偶條件一啲都唔挑剔，只要有實力同體貼，不過最重要都係孝順，因為我係巨蟹座好愛我屋企人。我家庭觀念好重，凡事都會聽屋企人意見，我每次拍拖都會帶畀屋企人過目，將來拍拖都會，佢哋say no一定有原因，我會接納後再觀察，不過佢哋話OK，我就OK呀！行世伯伯母政策實掂？哈哈……都係呀！

羨慕堂姐覓好歸宿

林峯胞妹林蔚殷被指像女版王祖藍、堂妹林夏薇卻被指翻版劉心悠，同是妹妹，卻稱號不一樣，還將二人作比較，果然「同妹唔同命」。林夏薇沒有驕傲自滿，言語間更處處維護堂姊，以證姊妹情深。

堂家姐係一個好善良嘅女仔，佢好nice，佢睇到報道冇唔開心，亦冇嬲我。佢依家覓得如意郎君，我睇到佢好都開心，其實我羨慕佢搵到個好老公至真！

深獲賞識處女代言

林夏薇早前處女下海，為恒生後人何乃斌太太何倍倩所經營的護膚品牌ZENSATION紓緩暗瘡精華液拍輯廣告硬照，薇薇坦言作為公眾人物，時刻要令肌膚保持最佳狀態，但因要拍舞台劇，捱更抵夜在所難免令面上長出暗瘡，幸好有這支神仙水令她保持皮膚白滑，薇薇坦言均衡飲食與充足睡眠同樣重要。

姓名：林夏薇

年齡：23歲

生日日期：30／6／1987

身高：165cm

體重：43kg

擅長：唱歌、舞蹈、鋼琴

畢業院校：中央戲劇學院

演出經驗：香港話戲團的劇目《2029追殺1989》、《魔鬼契約》、《彌留之際》、《中國皇后號》等

口述：林夏薇　筆錄：劉慰思　攝影：劉智源