陳慧琳懷孖女被禁抱蝦餃
以人工受孕懷孖胎的陳慧琳（Kelly）昨晚腳踏兩吋高踭鞋、身穿白色短裙綠外套，出席Audi全新型號A7 Sportback活動。巨肚如籮的Kelly宣布腹中佗住孖女，她笑說：「四個幾月啦，個肚比上次快大咗，覺得好『墜』。（會追？）唔使再生，老公同我都鍾意女，佢知係孖女都蓮子蓉咁，第一胎都想生女。」兩人還未幫孖女改名，她說：「好難諗，兩個字型啲。」她堅持會餵人奶，盡力而為，至於陪月則只會請一個。
肥了十幾磅的Kelly透露醫生指孖女size好靚，飲食方面她勁飲奶食鈣片，而工作方面，簡單的工作她仍可應付，她笑說：「跳舞就唔得，依家多咗時間陪蝦餃仔，但老公唔畀我抱佢，蝦餃仔未知發生乜事，臨生先同佢講。」她已為孖女準備衫褲鞋襪，笑言全部起孖，她會將自己的衣帽間改做BB房，所以計劃賣二手衫。
張智霖睇天意
同場還有張智霖、苗僑偉，張智霖對Kelly懷孖女，認為每個人有自己選擇，他屬自然派，覺得生育取決天意。苗僑偉笑言他那年代沒有人工受孕，將來他的仔女可以嘗試？他笑說：「千祈唔好，唔好咁快。」
活動中展示的Audi A7 Sportback五門轎跑車，外形設計源自1969年經典大型斜背100 Coupe S，擁有跑車流暢線條，眾嘉賓都對這款車讚不絕口，豪華舒適，兼有旅行車的實用性。
