婦女產後坐月禁忌多，既不准踏出家門，又不可以沖涼、洗頭和吹風，傳統觀念認為有機會因此令身體「入風」。不過在西方醫學角度而言，產婦首要注重衞生，關嘉美醫生說：「一定要洗頭同沖涼，無論係餵哺人奶或奶粉，接觸小朋友時候都要乾淨，入風其實冇乜醫學根據。」不過關醫生贊成產婦應該坐足月，她解釋：「唔主張通街走，依家豬流感盛行，好容易將細菌帶返屋企傳染畀小朋友。而且生完之後身體需要調理，每日要瞓多啲床，瞓床時仲可以將BB放喺胃腩上面，等BB感覺到媽咪心跳同體溫，促進母子關係。」