秋生聞強積金注資 扯火寸財爺

財爺曾俊華昨日公布2011至2012年度財政預算案，惜財爺未有還富於民，亦沒提出退稅措施，只向所有強積金戶口注資六千元，亦無提高個人免稅額，惹來怨聲載道！

「百果園咪神」陳靜表示：「冇得退稅真係有啲失望，如果似澳門咁直接退稅派錢就好，可以即刻袋錢入袋喎，畀六千元入強積金戶口又受惠唔到，我都冇戶口。（加煙稅呢？）冇影響，我戒咗煙好耐，我亦唔使供養媽媽，增加父母免稅額對我冇影響。唯一受惠係做業主有差餉同電費補貼，但太少喇，得一粒糖仔，叫做好過冇。」秋生則大講反話寸盡財爺：「六千元入強積金戶口？都好呀，放入強積金有用嘛，咁不如掉番轉，佢哋將強積金嘅錢拎出嚟畀番我哋，等我哋65歲還番畀佢哋啦。（加煙稅？）非常好，你有需要，煙仔咪係必需品，冇需要咪係奢侈品，咁加法，咪逼啲人知法犯法，鋌而走險走去買私煙！加紅酒稅仲好，啲高官鍾意飲紅酒，實畀得起錢。」

張家輝

陳慧琳

袁詠儀倡議派現金

「靚靚」袁詠儀亦滿腔怒火說：「我對呢份預算案唔係幾滿意！六千元入強積金戶口受惠唔到，要等到60幾歲至攞到，點解唔依家畀人用嚟解決問題？六千畀啲中等家庭幫阿仔交學費都好啦！」至於杜汶澤及袁彌明亦認同寧願直接派錢給市民，阿澤笑言：「現金係醫治情緒最好方法。」

任達華	杜汶澤	陳靜

張家輝同樣表示沒強積金戶口故未能受惠，他認為政府要還富於民，節省無謂開支；任達華和杜琪峯轟預算案對中產人士毫無幫助，亦不能協助扶貧，華仔說：「強積金根本就係錯誤決定！」另外，曹永廉在微博怒轟財爺對答不知所謂，完全不合格。

不過，陳慧琳卻開心謂：「免收差餉一年，可以慳番啲做奶粉錢同教育基金，如果免多幾季仲開心，可以幫到更多人。」

文：專案組