徐靖雯北京度歲變豐滿

農曆新年乃中國傳統節慶中最重要的日子，不少藝人都選擇於外地度歲，模特兒徐靖雯與無綫咪神梁政珏到北京、模梁雅淳過澳門、陳細潔揀法國加泰國，各適其適，各人都盡興而回。不過在哪兒過節都不是重點，最緊要是家中成員都能齊齊整整，聚首一堂。

徐靖雯

農曆新年返回北京一星期，跟家人及朋友一起過年。吃了很多，所以變豐滿了。本來想晚一點回香港，多休息，但由於有工作，所以回來了。

徐自賢

今年新年同香港嘅姐姐一齊過，佢哋迷信同信風水，我都睇咗。師傅話我今年會有正桃花！真係好期待！所以依家好留意身邊有冇啱嘅人出現，一遇到啱嘅就即刻發電！

梁雅淳

同一班朋友去澳門，一齊去睇表演！我哋以為自己離場地好近，但係點知好遠！（有冇賭錢？）冇呀，即日來回，唔夠時間，淨係掛住食嘢。

王喜

同父母一齊出海放生，嗰日大風大浪，啲浪差唔多有十呎！兩個老人家差啲碌落海！真係好驚險！不過佢哋好有善心，堅持一定要放晒先走，而且又有船家睇住，都OK！

呂慧儀

最難忘係《我愛HK開心萬歲》嘅慶功宴，因為收咗好多利是。（幾多錢？）仲未拆。台前幕後嘅工作人員都有畀我，有成十幾封！（自己有冇派？）我仲細，未派。

梁政珏

今年我病住咁過新年。返咗北京同屋企人過，但係因為中國嘅暖氣太高溫，所以搞到我生咗唇瘡，又喉嚨發炎。加上我又唔戒口，仲打邊爐，最後搞到失咗聲。同經理人溝通都要用WhatsApp！

郭秀雲

同家人去咗高雄旅行十日，由街頭食到街尾，真係覺得自己每一日都有增磅！我到依家都唔敢磅重。同埋當地氣氛好好，可以燒炮仗同放孔明燈。

陳細潔

去咗泰國同埋喺法國滑雪。不過我成個trip都好放肆咁食，完全冇諗過體重嘅問題。同埋成日瞓覺，最後肥咗五磅！不過我返到香港用咗三日就減番啦！