崔建邦演藝生涯幕前止步
崔建邦月前因停牌駕駛，被迫閉關「潛水」，無綫高層樂易玲昨日直批邦邦的「glamous life（演藝生命）短時間內唔可能再有」，但無綫仍給予機會，提議對方轉職幕後，從低做起。
崔建邦自去年底被發現停牌期間駕駛後，形象大插水，但這位前陳志雲愛將與無綫的合約尚餘數年才屆滿，無綫製作資源部總監樂易玲坦承正游說對方轉任幕後。
樂易玲說：「之前同崔建邦喺電話傾過佢嘅出路，了解番佢意向，佢係有才華，唔做呢行好嘥，不過係佢自己影響咗自己，坦白講佢嘅glamous life（演藝生命）短時間內唔可能再有，佢咁後生可以試吓轉做幕後，甚至由打雜做起。（無綫畀機會佢？）唔係公司畀唔畀機會，係觀眾接唔接受，觀眾接受佢，就畀工作佢，畀人投訴即係累咗佢。」
要時間考慮
樂小姐更以2004年因藏毒及後改過自新的周永恒為例，她說：「電視行業唔只係幕前，幕後都有好發展，導演劉偉強都係由攝影小工做起，周永恒入咗無綫做幕後，努力幾年，結埋婚有埋小朋友，人變得積極，無綫都簽番佢做幕前，呢啲都係正面例子，可以畀佢參考。」
問樂易玲崔建邦聽完有何決定？她說：「佢要時間諗，希望佢可以積極啲去諗，我約咗佢下禮拜見面再傾。（有冇問陳志雲意見？）冇同佢傾過，佢亦冇搵過我傾。」而直至截稿前，崔建邦及陳志雲均未有回覆。
文：影視組