周秀娜寸博宣傳 石詠莉認衰耍冧

周秀娜（Chrissie）前晚穿上低胸裝與師弟妹Annie G.、Hailey C.、Suki及Bro 5出席活動，同場還有鄭欣宜、女新人吳若希、謝雪心、薛家燕、石詠莉、羽翹及雷凱欣等。由於石詠莉日前趁灌錄新歌時大爆圈中「飯局名單」，還半公開有份出席的o靚模英文名字頭C及D，即惹起揣測。

興上腦急求醫

Chrissie與石詠莉前晚「夾都冇咁準」一同出席活動，可惜兩人前後腳到場未有碰面，聲沙沙的Chrissie透露剛自日本返港：「好凍，搞到發燒，尋晚（即前晚）落機後去睇醫生，原來耳膜發炎。」問她知否石詠莉爆圈中「飯局名單」？Chrissie說：「我睇完都頭痛，我得閒病唔得閒休息，唔理啦。」問她有否收過「問價」電話？她不置可否地說：「唔回應。（覺得對方博宣傳？）有啲可惜，知佢宣傳新歌，唔回應、唔想幫人宣傳。（怕唔怕畀人誤會你有份？）唔會。」

Chrissie坦言不知道有「飯局名單」，對於陳小春在微博狂插石詠莉是「妖精」及「爆石」，Chrissie說：「唔知，冇睇。」問到小春所形容的字是否很好？她尷尬傻笑說：「唔知，唔識答。」她透露稍後會與Jessica C.為電影拍攝寫真，更大方稱不怕比較，屆時更應會「球來球往」。

周秀娜昨日帶病出席春茗活動，仍穿低胸裝上陣兼大方受訪，果然夠專業。	早前取笑石詠莉有新花名的羽翹前晚亦有現身。	陳嘉桓與杜宇航兩位詠春高手孖住到場。

得戚接受花名

春風滿面的石詠莉被問到知否遭小春封為「爆石」？有備而戰的她得戚地說：「呢個花名一向都有，爆石好大工程。」她強調只是講出時下女性的價值觀：「我唔係博紅同出名，唔係只係話o靚模。（點解要爆料？）的確真係有呢件事情，點解唔可以講？總之唔會開名，唔想搞大件事。（已經搞大咗？）是但啦，可能係我表達能力有問題，誤會咗個意思，我講Sorry，要咁賺錢非我所為。」隨即認衰說：「係我唔啱，認衰女，經一事長一智，怪自己太直言。」

採訪：音樂組