千嬅馬爾代夫造人搽錯油
楊千嬅於今個農曆新年跟老公丁子高遠赴馬爾代夫及泰國共度二人世界，不過浪漫之旅卻因千嬅的任性而變成「燒焦之旅」，千嬅被追問此行是否瘋狂造人時笑言：「咁又冇狂做，只係做應做嘅事！」
大派利是
千嬅昨日出席「麥當勞叔叔之家慈善基金愛心團拜慶元宵」活動，甫到場即向一眾身患重病的小朋友大派利是，又跟他們玩遊戲打成一片，適逢二月十四日是千嬅農曆生日，大會即送上生日蛋糕及禮物給千嬅。而千嬅談及馬爾代夫之旅時則自爆：「我喺馬爾代夫曬太陽時曬燶咗，丁生有勸我唔好曬太耐，但我就任性，覺得咁貴唔曬好似冇買手信咁，就攞咗佢支太陽油搽完之後再睇書，點知瞓咗成個鐘，醒番全身都好痛，原來佢嗰支係黑鬼油！」
平息罵戰
另外，日前有報道指千嬅和容祖兒的歌迷在網上掀起罵戰，千嬅見狀即留言嘗試平息風波，並寫下一句：「你們讓我自豪！」怎料再度挑起兩批歌迷互罵，昨日千嬅表示：「其實我都唔係好知佢哋做乜鬧交，我見到有歌迷話自己冇參與鬧交，就用自己《斗零踭》嘅歌詞讚佢哋乖，點知就賴嘢！（延續咗個罵戰？）有延續咩？我只係做我自己嘢，其他事控制唔到，年輕嘅小朋友只係愛護自己偶像，再大多幾年就唔會咁！」
採訪：音樂組