名模何紫綸（Ann）入行多年一直靠自己的努力，直至月前才簽約經理人，一嘗被照顧的滋味，還成立了模特兒學校，曾經因情緒跌落谷底的她，終於走出抑鬱步向光明。
「自己喺呢行做咗十幾年，之前心情唔好，情緒抑鬱，覺得好唔開心。」問到Ann是否未放低跟張豪龍的八年情，她隱晦說：「其實當時好多嘢一齊湧埋嚟，好唔開心，好在後來有朋友帶我返教會，依家我最愛係主，有佢帶住我，成個人都開心咗。」
信不信由你，信主之後，Ann覺得一切都變得順利了，她說：「我簽咗經理人公司，仲接拍咗入行以嚟第一個廣告，依家成日上廣州、中山宣傳，希望可以打開內地市場，賺多啲錢。」由於她的公司有代理面膜，Ann開心謂以後有免費面膜扮靚，令她興奮高呼：「多謝最愛嘅主，新一年畀我最好嘅安排。」
在拍攝廣告當日，形象指導特別為她設計了一個冬菇頭，Ann笑說：「形象好清純，好似自己啱啱入行個樣，我仲自己配音，不過我把聲沙沙哋，好似卡通人物咁好搞笑。」除了有大公司射住，Ann還搞了一間模特兒公司，親自訓練有潛質的Model，培養新血。
採訪：音樂組