去年以「D cup版鍾麗淇」之名參選港姐的彭慧中，落選後即簽約無綫成為藝員，要暫時擱置大學畢業來摸索發展方向。年僅廿一歲的她承認讀書時期很「hea」，故決心戒掉「惡習」，希望在娛圈闖一番事業。
彭慧中（Phoebe）加入無綫後，即獲派去所羅門群島拍攝《森海尋寶》，之後又有份主持《更上一層樓》，最近更參演短篇劇《你們我們他們》，飾演一個對結婚有憧憬的伴娘。她說：「有好多內心戲同要做好多表情。（覺得自己表現合唔合格？）梗係唔合格啦！不過同場有江美儀、石修、江欣燕等前輩合作，我同羅孝勇係最新嘅。（同前輩合作緊張？）冇咁緊張，有佢哋喺度氣氛輕鬆好多。」
加入無綫短短時間，Phoebe已試過主持及拍劇，她表示拍劇可以試不同性格的角色，而主持就較貼近現實。她笑謂：「之前都冇諗過呢行係點，但依家覺得好好玩。（有冇訂下目標？）冇特定要好似做到邊個咁，想樣樣都試吓。始終我係新人，之前冇樣得，讀書已經hea，唔想再喺度hea，我想開拓自己喜歡嘅方向，再喺嗰度加以發展。」
Phoebe已準備學跳舞及唱歌，其中文程度亦可讀劇本，若遇不明就會向人請教怎樣演繹。她承認自己的缺點是表達能力較差，但就勝在廿一歲夠青春，為人友善又開朗，樂天的性格容易被人接受。
文：影視組 攝：司徒國榮