楊汀叮早前出席師姐兼密友Angelababy的美甲店開張儀式，原來她自己亦在同一幢大廈投資近六位數字開設的美容及按摩店，首次做老闆的她大嗌興奮：「同成班朋友都有晒全盤計劃，希望一年內可以回本，其實大家都係諗住想夜晚有個竇抖吓，自己做股東之餘都會成日去享受服務！」
初次做生意，汀叮自言捱更抵夜殘爆：「真係好忙，攰到爆炸，因為啲嘢仲未上手，有少少混亂，每日瞓得四五個鐘。」農曆新年快到，已獲公司批假兩星期的她會在旅行中度過新年，不過正心大心細諗緊去美國還是日本好，但她可以肯定的是不論去邊都會肥住回港。