基仔忙搵銀無暇結婚
古巨基及陳沛嘉等前晚出席日本餐廳開幕禮，對於有指好友楊千嬅因不滿在《2010年度十大勁歌金曲頒獎典禮》失落「最受歡迎女歌星」獎項，反傳統未有以「亞太區最受歡迎香港女歌星」身份於慶功宴後為官方刊物拍攝封面，勇奪「最受歡迎男歌星」的基仔說：「一開始都覺得奇怪，有問工作人員，知道佢因為有嘢做嚟唔到，（佢唔開心？）我諗唔係，慶功宴入面都有見到，大家都好開心，頒獎禮都過咗啦，希望少啲揣測，大家開開心心等過年。」
羨慕祖兒放長假
基仔透露新年將回內地登台搵真銀，羨慕同門的容祖兒放假兩個月，他說：「冇試過放咁耐，最長都係4、5日，好羨慕，但如果我同祖兒一齊放，公司都要有人做嘢o架，我頂住先，（怕放長假傳結婚？）傳我大肚吖﹗（留番結婚先放長假？）我結婚先去讀書，（幾時結？）有排啦，除咗演藝工作，自己設計公司都有嘢做。」
此外，無綫高層何麗全昨日出席另一活動，被問到有傳東亞因不滿勁歌頒獎禮賽果，決意罷簽無綫，他說：「要了解吓，每年頒獎禮都有人唔滿意，（頭痛？）唔頭痛，講競爭激烈點夠當年四大天王、天后？」
文：音樂組