偉仔嘉玲情書傳愛夠sweet
劉嘉玲與梁朝偉一起生活多年，原來兩人均有寫信的習慣，她認為透過文字及筆迹來傳情達意比SMS來得浪漫，更自爆會寫信放床邊，多年來已儲下相當數量，笑言有意放於保險箱收藏，待「貨不對辦」時拿來作證據。
去年連拍三片的嘉玲為宣傳馬不停蹄四圍飛，日前她為賀歲電影《最強囍事》接受訪問，大談拍攝喜劇的感受，她自言沒有喜劇細胞，笑位時間與大眾不同，不懂如何令觀眾發笑。
笑子丹冇喜劇感
對於拍檔甄子丹自誇有喜劇天分，嘉玲聞言哈哈大笑：「佢？唔係啩？如果佢有，我仲有啦！大家都錯晒，唔係佢慢就我快，可能咁撞埋一齊幾搞笑啩。」
嘉玲在片中化身空姐、作家、o靚模等造型，是否對o靚模造型印象最深刻？嘉玲笑謂：「咁事業線我有，只不過感覺唔同，年紀相差太遠，不過幾好玩。（偉仔有冇見過？）估佢見到，都要『骨』一聲吞落去，可能唔敢笑，但我接受到。」
情趣鎖在保險箱
戲中的幾個造型，與嘉玲飾演作家一角幻想出來有關，原來現實中的她也愛寫作，將一些感受及有感覺的事記下，這些記錄只會珍藏不會出書，問她可有寫情信習慣？嘉玲甜絲絲的說有寫信：「都幾浪漫，咁係容易感動到對方，表達又徹底，內容肯定明，加上用詞靚又唔係詩，可以收藏，咁多年大家都係放喺床邊。」她又指SMS沒有感情，大時大節也會致電向好友祝福：「聽真聲會好啲，轉發冇咩feel，冇咗種情懷。（喺信紙噴埋香水？）唔講，我覺得應該，係情趣嚟嘅，我要收喺保險箱，因為有收藏價值，第時貨不對辦就攞出嚟，不過人每日都變，啲信係睇住大家成長，所以好好。」
近期嘉玲在朋友邀請下兩度公開獻唱，絕對是友情客串，個人演出則免問：「我知道自己唔係，入去都冇feel，演戲就唔同，因為累積好多年經驗囉！」
文：影視組