祖兒捧發哥場憶往事
《讓子彈飛》前晚在港舉行首映，眾演員聚首一堂獨欠在內地拍戲的周潤發，令發哥小fans容祖兒大失所望，她平日甚少看首映，今次自動獻身就為捧發哥場：「三個咁有分量嘅影帝級演員，同埋套戲喺內地好收，想睇吓咩一回事，有朋友喺facebook大讚姜文，我都想錫佢一啖。（真係錫？）飛吻囉！」
原來祖兒與發哥有段七年前髮型屋相遇往事，她說：「嗰日我啱啱洗完頭，素顏成個傻婆咁，發哥剪完髮同我影咗張相，仲曬埋出嚟簽咗名放喺髮型屋，張黑白相好有feel，我仲放喺屋企個廳度。」另一次祖兒和同事在酒店食飯遇見發哥，大家爭相和發哥合照，祖兒大讚發哥親切，直情冧爆。問她可會主動要求加入續集？祖兒說：「唔好搞人哋啦，咁好成績。（小角色呢？）睇吓有冇咁嘅機緣啦！」
