林莉寧缺勿濫 聖誕不寂寞

有「港版林志玲」之稱的林莉，今年勇闖模界發展不俗，忙得就連聖誕節都要開工。不過向來孝順的林莉，百忙中仍堅持抽空陪伴家人，林莉說：「平時好少時間畀屋企人，雖然聖誕節係西方節日，但我覺得聖誕節應該同家人過，今年為咗畀驚喜，先前特登上堂學整火雞，平安夜當晚我整咗隻十幾磅嘅火雞出嚟，個個都讚好食，真係好開心好有滿足感，估唔到第一次整就咁成功！」

差點釀火災

搖身一變，變成聖誕美女廚神的林莉，笑言其實也有失手時。林莉說：「除咗整火雞，我仲焗蛋糕，可能連日開工真係好攰，焗緊期間我喺梳化瞌着咗，瞓瞓吓突然聞到好大陣燶味，所以即刻衝入廚房，點知見到個爐出晒煙，真係爭啲火燭，嚇死我！」

林莉首次焗火雞便獲不俗回響，令伊人大感高興。

多次行婚紗騷的林莉坦言渴望浪漫聖誕。

約會全推掉

曾說過不能一心二用，故暫時不會踏足情場的林莉，雖然有幾位追求者邀請去聖誕派對，但依然拒絕：「我都想聖誕節浪漫吓，不過都要同喜歡嘅人一齊先得，寧缺勿濫，加上我唔想對方誤會我有意思，所以一視同仁統統都唔去，攬住媽咪仲浪漫！」

採訪：名人組

攝影：黎志輝

服裝：Miss Sixty

化妝：Stephen Lau

髮型：POP Hair Dressing

場地：apm