向來都話鞋係女人最好嘅朋友，名模Ana R.都唔例外，佢仲係買鞋嘅狂熱分子，屋企起碼有六十幾對看門口。Ana買鞋好睇心情，開心就買彩色，唔開心就買深色，有次佢受咗刺激都係第一時間走去買鞋：「我記得兩年前同男友分咗手，即刻走咗去商場，諗都唔諗就買咗三對miu miu嘅高踭鞋，買完之後個心即刻舒服晒。」
Ana就話唔介意男朋友矮過佢，最緊要男方唔好自卑：「我着埋高踭鞋嘅話，要高過我起碼要六呎三吋，真係好難搵。矮過我唔緊要，但係佢要有自信心同埋接受到我高過佢。」佢話絕對唔會為咗遷就男友嘅高度而着平底鞋，因為咁就冇咗好多樂趣喎！
同埋Ana屋企雖然好多鞋，不過好多都係要嚟「睇」多過着，佢話有時有人去佢屋企，佢就會揀對靚鞋喺屋企着畀人睇。