杞人憂天膽小鬼 李玟掙扎8年破框嫁人

在舞台上處變不驚的李玟，私底下原是個杞人憂天的膽小鬼，在姐姐及男友的鼓勵下，才逐步衝破為自己立下的框框。

「家姐成日都哦我，話我咩都驚，以前畀自己好多rules，例如開騷前三個月唔去外地同小心飲食，怕有感冒、jet lag等意外影響演出，連穿耳窿因為怕發炎，都係28歲先穿！我好怕水，個rules係塊面唔掂得水，去旅行Bruce逼我玩潛水，我掙扎咗兩個鐘先玩，發現原來海底係咁靚，反問點解以前唔早啲玩？」

「唱歌係我第一份工，以往公司將我放喺保護網，話連食飯都唔可以畀人見，要保持神秘感！Bruce唔明白點解要匿埋，佢話：You got to live！如果你今日出去食飯，見到100個人，可能有多100個朋友喜歡你，因為佢哋見到real CoCo is more lovable！依家我可以一個人去行街，唔會由朝到晚都stardom，我係human being，所謂嘅rules，係自己畀自己！好似之前喺新加坡開騷前幾日，我去美國參加朋友婚禮，去完返嚟一樣成功開騷。」

看得開保持愛火花

思前想後及怕改變的性格，也是李玟明年才和訂婚八年的富商男友Bruce結婚的原因之一，兩人都是各有事業的大忙人，要保持關係長久具新鮮感，對於喜歡研究兩性相處的李玟來說，看得開、易地而處，是保持愛火花的關鍵。

「以前對承諾驚驚哋，後來我諗，其實只係title唔同，由女友變太太啫，根本冇改變到我哋嘅感情！今年佢喺我生日會上突然求婚，真係好shock！因為佢一向好低調，要喺咁多人面前講係好難，但佢係想尊重我，make it official。好記得佢當時求婚眼神tells all，全場都感受到佢對我嘅愛。」

「Bruce由nobody做到今日上市公司嘅大老闆，24小時都需要工作，有時可能放緊假凌晨兩點幾，突然間起身要處理公事，我只會斟杯水佢飲就算，唔會詐型投訴。唔好為嘈而嘈，否則問題永遠都喺度。亦都唔好講啲收唔番嘅說話，否則永遠都會令對方有條刺，我哋咁耐真係冇鬧過交。」

「如果對方做錯咗，但你成日諗住，就算佢做番一百樣好嘢，你一樣唔開心。每個女人都會經歷過，就係會為自己諗出嚟嘅嘢唔開心，其實點解你唔問吓自己：『點解當初你鍾意呢個人？你哋以前最開心係啲咩？』兩個人相處，係要try your best去please佢。好似我幫佢搞生日派對，搵番晒佢以前嘅女朋友嚟，因為呢啲係佢嘅成長一部分。」

姊妹情深

姐姐Nancy是李玟事業上的顧問，也是可促膝談心的聆聽者。訪問當天，看李玟和Nancy不時互窒互笑，Nancy邊傾電話，邊一眼關七提點妹妹的甫士，這對好姊妹實在是最佳拍檔。李玟更捉狹姐姐笑說：「我排行最細，自小冇發言權，所以慣咗觀察，例如見到家姐做錯事被媽咪鬧，我當然唔會做啦！」

Nancy聽罷即沒好氣白了一眼，同時又甜絲絲的笑起來。李玟續說：「媽咪三個都錫，如果我唔舒服，媽咪會照顧我；但家姐心情唔好，媽咪又會成日陪住佢，所以我哋真係錫到媽咪燶！」

放大圖片	李玟與姐姐Nancy誠然是最佳拍檔。

寧願領養拒找代母

將為人妻的李玟，誓言要做個101分的老婆，關鍵是要全方位擔任不同角色，令男人覺得自己是真男人。

「好多男人成日投訴女人婚後好煩，我聽得太多，一定要改變呢個想法！女人要become more sweet！等男人覺得娶個老婆返嚟係好值得！有啲伴侶因為有外遇而分開，我覺得你做老婆之餘，仲要做埋佢女友、mistress，you have to be all of them！當個男人同你一齊開心，佢無論傾偈、去玩做乜都好都會搵你，佢根本唔需要再搵另一個。男人思想好簡單，你要令男人覺得真係似番個男人，自己係好wonderful先得！」

生兒育女，是女性獨有的天職，直言有想過當母親的李玟，暫未有造人的衝動。「生BB係更大嘅承諾，我訂婚八年，都係依家先結婚，所以要生都係三、四年後嘅事。代母？美國係好流行，如果我有日真係生唔到，代母先至係其中一個選擇。講真，如果生唔到，我寧願去領養。」

三個C顯愛心

身為Estee Lauder「Re-Nutriv白金人生」大使的李玟，親自設計絲巾作慈善義賣。絲巾上的三個C，寓意Courage（勇氣）、Compassion（同理心）及Charisma （魅力）。李玟一直積極做慈善，這顆善心源於其母。

回饋社會

「有勇氣先可以面對人生嘅難關，有自信先有個人魅力，而愛心令自己同其他人都快樂，施比受更有褔。媽咪當年揀喺三藩市貧民區開診，就係想幫助露宿者、癮君子等被忽略嘅一群，媽咪教我要回饋社會。」

採訪：Winnie Choi 攝影：Marco Shum 髮型：Mike Wong @ P.O.P. 場地：Estee Lauder Beauty Centre (Times Square)