楊梓瑤撐謙仔冇毛手毛腳
近日與羅仲謙傳出緋聞的「浸大E神」楊梓瑤（Carol），對於謙仔再傳是花心公子，專「嗒」圈中靚女，Carol力撐謙仔是正人君子，她說：「佢冇對我毛手毛腳。」
成功躋身影圈的Carol，首次性感演出的新片《婚前試愛》在聖誕檔上映，並與大隻仔羅仲謙演對手戲，兩人更傳出戲假情真「暗交」兩個月！有指謙仔已有女友，因而激怒緋聞女友傅穎，她與謙仔公開決裂，近日再傳男方曾力追圈中多位女星，「集郵」關係七國咁亂！
唔鍾意大隻仔
Carol日前與師妹徐自璇（Cindy）化身聖誕性感女郎，Carol力撐謙仔是好男仔，替對方的負面新聞不值：「我覺得佢唔係咁嘅人，佢好有風度，就算拍床戲，都冇對我毛手毛腳。（有冇集你？）我又唔係郵票，我相信佢唔係啲咁嘅人。（你哋傳緋聞？）梗係唔係啦，我哋只係朋友關係，拍檔就有，拍拖就冇喇。（揀男友要似佢咁大隻？）唔使，大隻仔唔係我嗰杯茶，現實中普普通通OK架喇！」
Carol與謙仔在新片中有超激床上戲，令Carol大感尷尬：「因為真係好激，當時好多燈令大家都好熱，大家大汗疊細汗，加上我第一次拍咁激嘅戲，真係好緊張。」
Cindy願性感
至於擁有修長美腿的Cindy曾在澳洲讀書，是台灣人的她來港發展一年多，希望入行作多方面發展，更望可與型男吳彥祖合作，她說：「因為佢好靚仔。（如果要性感演出？）又唔會太介意，公司OK就得。」
文：專案組
攝影：黃叔榮
服裝：Blossom