謝安琪自保呻食叛將死貓
去年「四大唱片」與無綫因版稅問題決裂，令四大歌手紛紛轉投有線和亞視力保曝光率，現四大與無綫正式破冰，當日先後倒戈，被視為「無綫叛將」的謝安琪（Kay）、張敬軒和關楚耀（Kelvin），即面臨無綫秋後算帳，Kay力求自保說：「我絕對唔係第一個呢。」
雖然有指Kay和張敬軒與成功化解無綫與四大唱片關係的功臣陳志雲私交甚篤，但四大與無綫決裂初期，Kay是首位拒絕無綫採訪隊訪問的歌手，令人印象深刻，之後她為有線到韓國拍攝音樂特輯，不時說決裂後對工作未受影響。軒仔因聽從唱片公司之命，第一個以廣東話接受有線訪問，不過，要數此事件下成為最大無辜犧牲品則要數關楚耀，因他落實接拍亞視電視劇，現Kelvin兩頭唔到岸，「縮沙」不成，想上無綫亦未必受無綫歡迎！
「知唔關我事」
「三大叛將」昨日出席不同活動，Kay在台上演唱時語帶雙關說：「今年唔開心嘅嘢過去晒，嚟緊大家開開心心。」談及四大與無綫破冰成功，Kay說未收到公司正式指示，只是聽得外間的消息：「咁大團圓結局係好事。（陳志雲飛去外國講數你知唔知？）唔知，佢幾時傾，傾到乜地步都唔知，如果消息係真，咁樣呢份係最好聖誕禮物。（你係第一個接受有線訪問嘅歌手？）我唔係第一個，我好肯定絕對唔係。」她更否認自己是「頭號叛將」：「好慘，食死貓，我唔係第一個接受訪問，亦唔係第一個亮相其他電視台。（怕無綫秋後算帳？）我諗佢哋知唔關我事，呢隻死貓食咗好耐啦。」另方面，張繼聰希望樂壇少啲紛爭、多啲合作，之前傳Kay不被解封？他說：「我老婆又唔係唯一一個，都好吖，依家頒獎禮可以見到好多歌手！」
軒仔聽令公司
軒仔對破冰大讚好事，更形容似戀人，兜兜轉轉又一齊，他可會出席下月15日的《勁歌》總選？軒仔說：「歌手都係聽公司指令，喺國際公司感覺似員工多過歌手，但公司都係為歌手利益為主。」至於Kelvin昨日仍出現有線的活動，並繼續以廣東話受訪，不擔心被無綫封殺？Kelvin無奈說：「做artist唔諗得咁多，因為仲未接到公司新指示。」他說不能上無綫是有影響，很多節目播了大家都不知，但既然接了劇就不會推，相信無綫不會秋後算帳。而昨日所見無綫的採訪隊亦未見「解封」四大歌手做訪問。
文：音樂組