深情對話：雯女：我係無價

記：記者　雯：鄧萃雯

記：冧莊感受係點？

雯：今次冷靜咗，但唔代表我坐定粒六，只係因為有咗上年嘅經驗，上年攞完獎、做訪問再慶功，返到屋企個人興奮到瞓唔着。今年做完訪問只同fans慶祝完就返屋企，睇番錄影自己嗰一部分就瞓，個人冇咁興奮好快就瞓着，第二朝唔使校鬧鐘就自動醒，生活好快回復正常。原本以為完咗頒獎禮大功告成有得休息，點知屋企樓下好多狗仔隊，又有好多訪問要做，原來仲關我事！

不再嚴肅 珍惜朋友

記：有冇獎勵自己？

雯：有呀，買咗杯水果攪冰飲，我好鍾意飲，但平時唔敢飲o架！其實我有新諗法，以往我對自己好嚴肅，只顧工作而忽略朋友，覺得同朋友相處好奢侈，但依家我會珍惜眼前人，所以第二朝羅慧娟約我，我就同佢去咗食晏。

記：未有男友，所以珍惜朋友？

雯：喺我心目中老公、男友唔係特別大，就算有，朋友同家庭都一樣重要。

去年帝后

今年冧莊

默默耕耘 締造歷史

記：非親生身份冧莊，覺唔覺為某類同志打咗強心針？

雯：我係代表咗某一班人，相信佢哋見我攞獎都會「Yeah」一聲，證明唔一定係無綫人至攞到呢個獎，仲要一連兩屆喎！其實邊一行都離唔開人事關係，我做咗人辦，畀個正面訊息、信念佢哋，唔好咁易放棄，我都經歷過做三線、配角、媽咪角色，一樣爬番上嚟。但有啲人被打擊就會挫敗，一定要有堅毅嘅鬥志支持。我感謝上天畀我咁熱愛做戲，只要默默耕耘就有回報，我同祥仔都係咁締造歷史。

記：樂易玲話你天價，會認真考慮簽無綫？

雯：我係無價寶呀！我只望拍更好嘅戲，近年我做嘅都係有經歷嘅角色，再攞視后，有好強烈嘅使命感。某程度上我唔向錢看，我一向都嚴選劇本，漸漸啲人就對「我」有要求！好似梅莉史翠普咁，佢做嘅戲你都會諗有一定水準。我唔係勤力搵錢嘅人，愈有使命感就愈會揀。

停工一年 走出陰暗

記：加唔加價？

雯：哈……咁多嘢要揀，仲要加價？冇得拍喇！好多人都揀好嘢嚟拍，我要減價嚟爭啦！樂小姐咁講係客氣啫，咁無綫都係我嘅首選嘅。

記：乘勢打入大陸市場？

雯：我係放軟手腳，其實我都幾懶，如果唔係揀，一年可以拍三、四部。上年係我嘅「愛我自己」年，我停工一年讀課程，將自己人生嘅陰暗面、心裏面嘅刺處理好，我好識平均分配自己嘅生命，唔會側埋一邊，就算會令我更有名有利，我都唔會理。

文：影視組　攝：劉智源

祥仔：時機未到

記：記者　祥：黎耀祥

記：今年攞視帝同上年攞嘅心情、感覺有乜唔同？

祥：好認真咁講，的確冇舊年咁意外同興奮，因為「最佳劇集」係我最想攞嘅。我攞獎唔等於劇組攞，攞劇集獎係成個劇組有份，喜悅多十倍。所以之後我都有失望同冇心機，由開心跌番落去。初時大家都好有信心，估唔到最尾會有變數。

雖非親生 全力以赴

記：頒獎禮經常被指係政治遊戲，但你同雯女唔係「親生仔女」都同時冧莊。

祥：呢個遊戲始終有一個常規，好多客觀上嘅嘢唔可以違反。至於外間經常以親生仔嚟比較，但如果有號召力，公司係唔會計較你係咪親生仔，公司分析到大家都幫到公司賺錢。喺TVB拍劇，拎去賣埠賺到嘅錢仲多過抽佣嘅錢啦！我同無綫簽嘅係基本藝員約，同無綫計show，我仲有兩年合約喺身，係唔係親生仔我都係咁做。

但求開心 合作愉快

記：若果無綫今年好有誠意同你傾包薪合約，會唔會簽？

祥：有朝一日老婆同我講話好辛苦，考慮啦！到時我可能會搵人幫我，但依家唔係時機。其實舊年樂小姐（樂易玲）的確係同我傾過，但好尷尬，我年紀大，唔係後生仔，舊年唔簽，係因為我手頭上都有好多網絡、工作，我幾十歲人咁多「家當」一下子畀埋你，會好冇安全感。喺呢行廿幾年，我見得太多，我自問但求開心、舒服，大家都冇壓力，依家同無綫合作好愉快。

不貪名牌 知足常樂

記：《義海豪情》大結局喺廣州有千幾萬人收睇，據知你之後亦會去北京攞「年度港台最受歡迎藝人」獎，其實你有冇認真考慮趁勢打入內地市場搵「人仔」？

祥：唔會，之前有大陸劇搵我都推咗，自己主力市場喺香港，已覺得好滿足。尤其我哋啲住家男人，又鍾意食屋企飯，個仔又係成長階段，都想多啲時間陪佢。其實都想減產，始終冇嘢及得屋企。我哋唔需要一身名牌、食貴價嘢，一家人喺屋企食即食麵、煲粥都已好開心同滿足。

文：影視組 攝：秦健輝

場地：沙田麗豪酒店

髮型：Ivan Lee@HEADQUARTERS