糖兄妹無懼競爭以獎報恩
組合糖兄妹走民歌路線，以廣東話及國語雙語齊飛，面對樂壇新進組合競爭激烈，他們坦言對創作的音樂有信心，希望用獎座回饋公司的栽培。
糖兄妹是維高文化力捧的全新創作組合，糖兄阿峰跟糖妹Kandy兩人合作無間，以一支結他、一個搖鼓唱過大大小小商場騷，又為台灣歌手的演唱會擔任暖場嘉賓，演出經驗可謂非常豐富，Kandy說：「其實上年我哋去過台灣春天吶喊，又做過wild day out，真係吸收好多現場表演經驗，以前出場前都會好緊張，依家變膽生毛喇！」
性格一凹一凸
而Kandy跟阿峰性格一凹一凸，分別負責填詞及作曲部分，分工合適，爭拗自然會少，問到一對糖兄妹有否鬧過交？Kandy說：「我有時會嫌佢煩，佢會好似阿媽咁哦我，可能自己男仔頭性格，比較爽直，佢有時講嘢講一半唔講一半，我會逼佢講埋佢！」
EP好賣增信心
樂壇頒獎禮將至，新人獎一如以往都爭崩頭，特別是今年組合之多，不能不承認競爭性相當大，阿峰說：「我哋係唯一唱國語歌嘅組合，加上我哋係自己創作，隻碟仲要去埋台灣製作，音樂上會加分！」糖兄妹首次推出的EP早已賣斷市，令二人信心大增，Kandy說：「其實我哋冇乜點諗獎項，不過公司投放咁多資源畀我哋，公司同事又錫我哋，想用個獎嚟報答佢哋！」
採訪：音樂組