李蘊約網友醒水放飛機
宅男女神李蘊（Renee）近日為電台短劇扮演一名援交少女，劇中她在網上「招客」，直言此角色是新挑戰的她，原來小學時期曾在網上聊天室交友，更被男生約她出街，最後擔心誤交損友，結果臨時放飛機！
年僅19歲的李蘊擁有甜美樣子，甫出道已成為宅男女神，由於早前推出的寫真集反應理想，有電台邀她與好姊妹E Cup Baby劉欣宜合作短劇《一念之間》扮演私影援交女。因角色相當大膽，Renee直言是個新挑戰：「第一次做呢類角色，導演搵我係因為覺得我年紀啱，成個學生妹咁，自己初時都有啲接受唔到，但知道係叫時下年輕少女做任何事之前都要三思，所以我決定要演好呢個角色。」
未曾私影
十二歲便入行的Renee，慶幸因有經理人公司安排工作，亦信任公司的安排，故未有接觸近期盛傳的o靚模富豪飯局，她說：「我聽過呢啲傳聞，但冇接觸過，如果有人請我食飯，我一定會拒絕。」Renee表示因太細個入行，所以無人找她私影，但她知道有些女仔私影時愈影愈性感，甚至會有身體接觸。
上網解悶
不過Renee自爆小時候因在家冇嘢做，曾用網名「靚靚女」上網搵人傾偈解悶，更曾經約過網友見面，但最終怕有危險而放網友飛機。李蘊否認上網交友是為了識男仔，不過回想當時牆景，仍然覺得好笑。
文：專案組 攝：林楠 髮型及場地：Zell Leung@HH