吳澋滔學業為重母禁拍戲
司馬燕一家於前晚齊齊參加慈善聖誕派對，她的大仔吳澋滔更是搶盡風頭，被不少人大讚靚仔。雖然囝囝天生一副明星相，不過她表示囝囝現在以學業為重，暫時不會接拍電影。
司馬燕前晚與老公及兩名囝囝一起出席珠寶品牌Tiffany & Co.為「母親的抉擇」籌款所舉行的聖誕派對，其他嘉賓包括有李嘉慧、周國豐一家三口、莫可欣和囡囡等。而當晚最搶鏡的就是司馬燕的大仔吳澋滔，今年十三歲的澋滔愈大愈靚仔，加上一身官仔骨骨的打扮，儼如一位小紳士。
未有拍拖
問到司馬燕囝囝可有拍拖，她說：「應該冇拍拖，不過拍拖都唔話我知啦！（囝囝會唔會再拍戲？）暫時唔會住，依家拍戲好多時都要喺大陸拍，冇可能就到，除非係喺暑假時拍同埋啱劇本，目前囝囝以學業為重。」
嗜好多多
她又透露一家人會於今個聖誕到加拿大滑雪，她說：「我哋年年都會去，兩個囝囝嘅滑雪技術一流，大仔仲畀教練讚話如果佢長期留喺當地，可以做教練。（會唔會畀佢喺呢方面發展？）佢好多嗜好o架，又足球又網球。（今日嚟呢啲活動囝囝會唔會嫌棄係畀小朋友？）唔會，佢好聽爹哋媽咪話，而且呢個係慈善活動，佢哋都好樂意參加。」
另外，已甚少出席公開活動的模特兒李嘉慧就表示慈善活動令她更有動力，故即使忙也會盡量抽時間參與。
文：名人組