側田嘆遭利用：無恥！可悲！

側田昨晚為《勁歌金曲》錄影，對於跟木村乃傳出緋聞，側田明顯有備而來，主動解釋事件，他指已不止一次被人利用做宣傳：「呢件事可以用無恥同可悲嚟形容，呢個日本女仔，喺三年前經朋友介紹認識，只係見過兩次，同佢無關係，（呢個日本女仔係邊個？）木村乃，（話你哋拍拖？）好荒謬！」

承認以前有出去玩

側田還表示現甚少去蒲，日日留在家中：「已經有兩年無去玩，日日喺屋企煮飯煲湯，同啲街市阿嬸熟啲，今次已經唔係第一次，係第四次畀人利用做宣傳，（點解成日都係你？）我容易囉！以前我的確有出去玩，依家已經改變生活方式，希望以前嘅事大家唔好再提。」

放大圖片	側田以前多次被拍到夜蒲，更曾與崔建邦各與女伴離開夜店。

問到側田現在的心情，會否好嬲？他表示：「都唔係第一次，已經化咗，無理由個個禮拜有個女仔出嚟話同我有關係，我就去開記招回應，我無呢啲時間。」談到此事會否幫到他宣傳個唱？側田表示：「呢啲嘢非常可恥，如果靠呢啲嘢嚟買飛……」說到此處，側田搖一搖頭，然後續說：「不如我自己爆。」

韓籍女友投信任票

側田又稱經朋友介紹而認識女方，至於其韓籍女友知不知道此事？他表示：「之前知道，我自己唔多唔少都有唔開心，女友梗係都會有少少，但佢都有聽我解釋同相信我。（以後檢點啲？）自己已經好檢點，好耐無出過街，已經改變咗，我都玩完。」之後知講錯後，即更正「我都玩夠」，並稱想有新開始、有個家，並希望明年能實現。談到會否出信告人？他表示：「告得入咩？不過我都無錢。」未知是否受到緋聞事件影響，昨晚側田錄影時，有點甩嘴，表現有些失準。

文：影視組