官恩娜（Ella）予人感覺傻傻更更，私底下嘅佢仲係個不折不扣嘅「傻大姐」。早前佢為身體着想，搬去離市區較遠嘅上水村屋居住，不過每日坐的士出市區做嘢嗰筆錢實在太「甘」，為咗慳番啲的士錢，Ella就買咗部私家車代步，點知就「賴嘢」！
話說前幾日Ella喺深水埗有個活動，通告兩點半鐘，但Ella接近三點都未蒲頭，姍姍來遲嘅佢氣喘喘同記者解釋：「我架車本來裝咗衞星導航，點知個系統係咁點我去荔枝角，兜咗好多個圈都搵唔到條啱嘅路，後尾我截咗架的士叫司機帶路，個的士司機好好人，佢唔單只帶我路，仲唔收我錢，真係好多謝佢！」出門遇貴人，Ella注定有運行！
