Snap Shot：Ivy愛手機自拍keep靚樣
o靚模蔡瑩瑩（Ivy）雖然不是專業攝影師，但喜歡密密影的她攝影技術絕對見得人，除了用手機為愛犬影生活照外，這位「理大校花」任何時候都愛用手機玩自拍，尤其是自拍大頭照來記錄靚樣，更會用手機程式為靚相加工，亦反映當時的心情。Ivy說：「我鍾意用手機幫自己影Snap Shot，夠晒方便，又可以即時用apps加工，最重要係可以即時上載去微博。」
我成日都會用iPhone apps幫自拍照加工，唔同嘅效果可以突出嗰刻嘅心情，我鍾意懷舊feel嘅相，好有情調，最唔鍾意係美肌功能，令到皮膚質地好怪。
我鍾意做完嘢或做緊嘢時影低自己個樣，無論係好精神、好攰，都會影。戴住眼鏡呢幅其實係做嘢做到好攰，返到屋企時影，雖然做到雙目無神，但忙係好事。
我比較少影街景，影呢張相嗰日天氣勁好，個天好藍，尤其喺中環，好少會天朗氣清，右面咁啱有幾棵樹，椰林樹影，突然覺得好似離開咗香港，好舒服。
我鍾意幫我隻狗仔影相，佢叫Amor，係西班牙文「愛」咁解，雖然只得兩歲，但好惡架，如果你搶咗佢咬住嗰舊至愛嘅骨頭，佢會咬你手指。
