字圓其說:高海寧馬賽姚子羚擇男靠索

女人擁有天賦直覺,準確程度往往令人嘖嘖稱奇,同屬八十後的高海寧、姚子羚和馬賽均認為揀男人除了用眼睛去看,仲要「索」,臭味相投原來確實有根據。

高海寧:高 馬賽:馬 姚子羚:姚

靚仔都要合眼緣

以貌取人最為尋常不過,高海寧、馬賽和姚子羚又會點睇男人呢?

高:睇男人要整體,就算好靚仔,但企出嚟得160cm嘅高度都唔掂,仲有身形整體都要靚先得,咁生出嚟嘅BB先高高大大。

馬:一定係睇樣先,然後望身材,其實唔使好靚仔,順眼就得。

姚:眼緣,一定係望樣先,我好注意男仔嘅談吐,有啲男仔笑到女人聲咁,諗起都毛管戙。有少少肉哋最好,唔使太靚仔。

高:我見到靚仔會縮沙,自己性格多疑冇安全感,靚仔唔得。

姚:我仲會好留意男人嘅體味,唔係講香水味,每個男人都有自己嘅味道,各人嘅喜好都唔同,好似有啲男仔有臭狐味,但係佢女朋友會覺得冇嘢。

高:係喎,鍾意就覺得佢陣味好好聞,以前男朋友都問我點解成日索佢。

姚:味道好緊要架,以前有個男友嘅香水味聞到入晒腦,行街聞到同一樣嘅香水,以前啲片段即刻出晒嚟。

馬:有研究講異性相吸係氣味行先,女人係認味。不過,乾淨好緊要,污糟唔得囉,之前犀利哥咁污糟,幾靚仔都唔得啦。

八十後眼中港男

近年香港湧現電車男、宅男等奇男子,八十後的高海寧、馬賽和姚子羚對「港男」又有甚麼印象呢?

高:好極端,有啲好成熟,有啲好hea,自己就鍾意上進嘅男人,唔好成日諗住自己仲細,唔行出第一步又點會有成功一日呢,但係有唔少人書又唔讀、嘢又唔做,淨係識得攤大手板問屋企攞錢。

姚:香港嘅男仔自尊心太強,同其他地方嘅男仔比少咗一份純真。好似讀書嗰陣,有啲男仔因為追唔到你會喺你面前喊,純得好可愛。

高:香港部分男仔其實缺乏自信,見女朋友同其他男仔出街就亂諗,世界唔係男人就係女人架啦。

姚:分別在女仔唔做得,男仔就可以照約其他女仔出街。

馬:我以前啲大學同學,有錢嘅只係掛住玩,冇錢嘅就畀自己好大壓力要上進,都驚佢諗埋一邊。有朋友三十幾歲人結咗婚,都仲係問父母攞錢,碌父母張信用卡。

高:香港男仔其實應該去當兵,畀佢哋磨練吓,太幸福唔識珍惜。

馬:所以呢個年代有好多所謂宅男出現。

姚:其實佢哋應該試吓自己生活,一個人去旅行,學吓獨立。

馬:應該要搵自己嘅人生目標,世界咁大要去見識多啲。

揀另一半 有辦睇

三位美女相信是不少港男的夢中情人,講到擇偶又有甚麼條件呢?

馬:最緊要溝通到,講咩話題大家都傾到嘅、價值觀要接近、要好了解對方。如果大家真係好愛對方,咩缺點都可以包容,呢樣係我追求嘅。

姚:要有責任感,責任感對男仔嚟講好重要,唔係點做一家之主?

高:大家要坦誠,我唔係你肚裏面條蟲,有咩拎出嚟講,感情唔係互相猜度。仲有唔使靚仔,好似劉青雲吖,演技又好,又錫老婆。

馬:謝霆鋒都好好,同栢芝發生咁多事,兩個人始終都咁好,又顧家。

姚:我就揀張家輝,錫老婆之餘又風趣幽默。

戀愛經歷 高海寧垃圾桶情緣

高海寧的初戀卻與垃圾桶有關,她說:「當時同朋友為會考喺中央圖書館溫書,有次我突然間腳軟,成個頭撞咗落垃圾桶,全場人都望住,好尷爆,初戀男友喺呢個時間出現慰問,冇耐我哋就開始拍拖。但只拍咗個幾月,因為自己任性冇體諒佢做兼職陪唔到我,就同佢講分手,之後都好後悔喊咗成個禮拜。」

後來高海寧再拍過兩次拖,最長也只維繫三個月,她認為因過往對自己沒信心,疑心男友作反,她說:「三次拍拖嘅經驗學到唔好只係諗住去改變別人,愛情係需要互相遷就。」

馬賽洗衫房拍拖

馬賽先後拍過兩次拖,十五歲那年在同學活動中認識隔籬班同學而展開初戀,她說:「細個拍拖都係一齊溫書、睇戲。最難忘有次喺我生日前佢呃我話屋企人要佢去澳洲讀書,當時好傷心,點知佢喺我生日會上突然出現,失而復得嘅感覺非常驚喜。」

之後讀寄宿學校的馬賽與另一高班同學拍拖,她說:「寄宿生活好單調,我哋嘅拍拖生活係一齊去 洗衫房洗衫。之後佢去咗英國讀書,因為大家嘅思想都有改變,開始溝通唔到,最後都冇辦法,惟有分開。」

姚子羚戀上好籃兒

姚子羚的初戀發生在中四,喜歡打籃球的她戀上高一年級的師兄,她說:「嗰陣好鍾意喺學校睇佢打波,經同學而認識佢,好自然就開始拍拖。」不過,初戀卻未有為她帶來浪漫回憶,因兩人「未拖手已分手」,她說:「依家諗番都幾純真,可能佢太怕醜啦。」

拍過八次拖的子羚,刻骨銘心要數在澳洲讀書時與馬來西亞男友拍拖,她說:「佢好錫我,將做兼職賺嘅錢買咗條鏈送畀我,點知我唔見咗係咁喊,佢又再儲錢買番同一條鏈氹我,但最後我都唔見埋。」後來因相隔兩地而分手,姚子羚指雖然有點遺憾,但總算生命中出現過愛錫自己的男仔。

採訪:影視組

攝影:劉智源

場地:Marco Polo Hong Kong(Cucina)

服裝:TED BAKER

髮型:HAiR@Jack Lau(高海寧)、Hair Corner@Taylor Wan(姚子羚)