吳雨霏唔爭一姐姊妹情深

Kary明年1月30日在紅館舉行「2011 Kary On Live」處女個唱，曾經歷過組合Cookies、樂隊Ping Pung年代的Kary，接着又以個人姿態推出唱片，今年又與樂隊Hardpack合作，雖然是「百搭」女歌手，卻容易予人定位不清晰感覺。

性感冇底線

對此Kary絕不介意，她樂觀地說：「我知道呢啲冇可能抹得甩，我從冇擔心過或嘗試要擺脫，好多嘢係一步一步嚟，我依家朝住Rock嘅方向，希望演唱會後定位更加清晰。（歌衫性感？）唔一定好sexy，總之會誇張啲同大膽啲，我個人對fashion冇乜底線。」

男友唔詐型

有傳她爬過Stephy頭搶閘在紅館開個唱，因而升呢為「金牌大風一姐」，Kary「嘩」言：「嘩！叫霏妹好嘞，我哋路線唔同，佢花多咗時間喺電影，拍戲對我嚟講係side project，唔可以話超越，好相信公司決定。（會唔會影響姊妹情？）No啦！佢戥我開心，就算佢開騷，我都戥佢開心，先後冇話邊個好唔好，唔係話要鬥乜。（爭一姐位？）從來冇爭過喎，我唔恨呢啲嘢，識我嘅人就知我唔理呢啲嘢。」

Kary亦會叫Cookies其他成員捧場，即使不齊人都冇所謂：「佢哋都戥我開心。（男友呢？）都會支持。（冇時間陪佢？）佢唔會詐型。」

採訪、攝影：German　服裝：Injury　髮型：Heibie Mok@Hair Culture

化妝：Cyrus Lee@Beauty Tech　場地：Armani Bar