鄭文斯拒做隆胸o靚模
擁有44吋長腿的模特兒鄭文斯（Mancy），三年前由名模樂基兒帶入行，加上父親乃無綫高層鄭偉強，可謂「朝中有人好辦事」，不過Mancy卻從未想過靠關係入無綫，原來她除了當模特兒，兩年前看準婚禮策劃師商機，一圓做老闆娘心願！
跟外籍男友拍拖多年的她，坦言已有結婚打算：「都有傾過，到時會幫自己搞婚禮，不過我哋追求簡單生活，所以我嘅夢想婚禮係好簡單，最好只有二十人以下，得自己家人同識咗好多年嘅朋友。（爸爸有冇意見？）佢最緊要我開心就得o架喇！」
現為模特兒的Mancy，走型格路線，對於現今模特兒隆胸搶鏡，她即耍手擰頭說：「我鍾意天然，我又唔係o靚模，如果個人咁高再整大個胸會好怪，身形比例都冇咁靚。」她又透露曾為一間銀行拍攝電視廣告，令她留下深刻印象：「因為個廣告想帶出瘋狂感覺，導演要我不停食嘢，仲要我用手食肉醬意粉，我食到成面都係，事後隔咗兩個月都冇食過肉醬意粉。」
服裝：Ztampz