近年主攻內地市場的李彩華，早前長駐上海三個多月拍攝內地長劇時，獻出入行以來第一次，初嘗當母親滋味的她，為氹小演員歡心，預先購買了大量零食來「賄賂」戲中兒子。
李彩華（Rain）早前拍攝改編自韓劇《妻子的誘惑》的六十集長劇《回家的誘惑》，跟內地演員姚晨老公凌瀟肅飾演情侶。
劇中Rain下嫁給凌瀟肅，但後來老公卻搭上自己的好姊妹，Rain被拋棄並要與兒子相依為命。
初為人母的Rain，因要長時間與五歲的小演員Jerry合作，便以零食攻勢來博取小童歡心，她說：「我以前從未真正同小朋友合作過，所以預先買定啲零食、糖果去賄賂佢，有時我又主動撩佢玩，所以我哋好快就熟落咗，佢好聽我話，我哋合作得好愉快。」
劇集拍至尾聲，Rain在最後一場遇溺場口差點弄假成真，她說：「當時我要行到幾深水嘅位置拍，但腳下面有一啲尖嘅細石同埋淤泥，差啲拉唔番隻腳上嚟，加上啲海水好污糟，搞到我之後皮膚敏感，雙眼發炎，不過效果拍出嚟好，都係值得嘅。」
另外，隨着Rain近年拍攝了多套內地劇，知名度相繼提升，早前她親自接了一個由ICB時裝品牌舉行的活動，到上海擔任嘉賓，大會更出動四名日本大漢全程貼身護駕，她說：「我由落機嗰刻，已經有四個保鏢鑽石形咁圍住我，以前都未試過，所以覺得都幾誇張。」
文：追蹤組