型女愛爛牛 楊汀叮貼身晒曲線
模特兒楊汀叮雖然個子並不高，但擁有纖瘦平均的身材，她情有獨鍾牛仔褲，而且鍾意DIY，將平凡的牛仔褲變得獨一無二，最愛將它「界爛」，覺得爛牛仔褲充滿野性又帶Rock味，最合她的型女路線。
楊汀叮對牛仔褲情有獨鍾，而且鍾意玩花款，見到不同類型的牛仔褲，即變得雀躍，滔滔不絕大談牛仔褲經，她說：「我平時最鍾意着牛仔褲加T恤，覺得方便有型，依家屋企有三、四十條牛仔褲，我鍾意有啲特色，如果款式無特別，就會將佢DIY，有啲鑲閃石、加喱士花邊、加窩釘，甚至界爛佢，特別爛牛仔褲更是我嘅至愛，我覺得好有型，有種好Wild、不羈嘅感覺，自己界可以控制好啲，變得獨一無二！」
喜歡Rock打扮
汀叮又謂最愛貼身牛仔褲，因可展示腿部線條，她說：「喺冬天着貼身牛仔褲特別靚，因為天氣凍上身會着好多衫，個人會變得臃腫，配貼身褲令個人睇落瘦咗修長啲！」
對着衫甚有研究的汀叮自言喜歡帶有Rock味的打扮，想向型女方面發展，最愛黑、白及灰配搭，而平時最愛睇時裝雜誌學穿衣之道。早前汀叮為意大利時裝品牌Fly Girl拍攝今年秋冬女裝系列，她謂系列充滿型格，少女味重，完全凸顯女性線條，除了最愛的牛仔褲，簡單的人物圖案上衣、收腰的短外套、粗豪的腰帶，均是今個冬季的潮流之選。
採訪：Jessica Lam
攝影：沈健程
化妝：Angela
髮型：Jan Choy by HH hair.nail