蛻變搣甩少女味 傅穎抗拒愛情散餐

Theresa新碟取名《Metamorphosis》，倣效毛毛蟲蛻變成蝴蝶，封套有黑、白兩個version，她說：「黑色係烏鴉，白色係白鴿，以前出碟好少女、性感，但呢隻完全係另一個人，cover都認唔到嗰個係我。」

加盟星皓推出首張碟，怎知卻撞上聲帶出事，本來灌錄四首歌，最後一首快歌卻唱不了，她慨嘆：「今次做呢隻碟幾經艱辛，做嘅時間幾長，開會、搵歌、監製、填詞，感覺好似BB仔學行路，但有一個遺憾，本身仲有一首快歌，因聲帶問題錄唔到！」

勇於嘗試

主打歌《加加夫人》是首紅色電子快歌，在金牌大風年代，Theresa已經好想做張跳舞碟，她說：「我想做啲以前冇做過嘅歌，搵咗林若寧填詞，第一份詞講狄娜姐姐，但我同監製都唔了解狄娜姐姐，林若寧再填就搵Lady GaGa做代表人物，想講畀大家知我係勇於嘗試，有創新精神。」而《無敵》就是《加加夫人》的國語版，Theresa用一星期苦學國語，她說：「一唱錯老師就叮，要好似內地人唱國語歌。」

見識增多

另一首慢歌《黑房》由周永恒（Roy）作曲，講現代的愛情好似即影即有相機，唔鍾意就delete，沒有了沖曬菲林的期待心情，亦道出了Theresa的愛情觀：「我唔鍾意拍散拖，要諗好耐先決定開始一段感情。」而今次跟Roy合作更令她有好大得着，幫她戒掉哭腔，她說：「以前出碟同一個監製，用一個模式唱，依家學識好多。」

採訪：音樂組

場地：奧海城

髮型：Vince Pang@IL COLPO-TST

化妝：Theresa Fu

服裝：HYSTERIC GLAMOUR